SEPAH ABŞ-ın bölgədəki mövqelərinin vurulduğunu açıqladı
İran İnqilab Keşikçiləri Korpusunun (SEPAH) Hərbi Dəniz Qüvvələri cümə gecəsi yaydığı bəyanatda ABŞ-ın İran sahillərinə endirdiyi hava zərbələrinə cavab olaraq bölgədə Amerika ordusuna məxsus mövqelərin hədəfə alındığını açıqlayıb.
Bəyanatda bildirilib ki, ABŞ İran sahillərinə müxtəlif bəhanələrlə, o cümlədən Hörmüz boğazından icazəsiz marşrutla keçdiyi iddia edilən gəmini əsas gətirərək hava hücumu həyata keçirib.
“İslamabad Memorandumu”na istinad edildi
SEPAH bəyanatında vurğulanıb ki, “İslamabad Memorandumu”nun beşinci maddəsinə əsasən, Hörmüz boğazında gəmiçilik hərəkətinə nəzarət İranla koordinasiya şəraitində həyata keçirilməlidir.
İran tərəfi ABŞ-ı bu razılaşmanı pozmaqda və müxtəlif tərəfləri öhdəliklərin pozulmasına sövq etməkdə ittiham edib.
İran: Hücum təkrarlanarsa, cavab daha sərt olacaq
SEPAH bildirib ki, ABŞ-ın son əməliyyatına “uyğun cavab” verilib və bu mövqe bundan sonra da qorunacaq.
Bəyanatda xəbərdarlıq olunub ki, ABŞ tərəfindən oxşar hücumların təkrarlanacağı halda İranın cavabı daha genişmiqyaslı və daha sərt olacaq.
ABŞ hücumun həyata keçirildiyini təsdiqləyib
ABŞ Mərkəzi Komandanlığı (CENTCOM) daha əvvəl yaydığı açıqlamada İrandakı bir sıra hədəflərə zərbələr endirdiyini təsdiqləyib.
Vaşinqton bu əməliyyatın İranın bir gün əvvəl Hörmüz boğazından keçən ticarət gəmisinə hücumuna cavab olaraq həyata keçirildiyini bildirib.
CENTCOM-un məlumatına görə, əməliyyat zamanı raket və pilotsuz uçuş aparatlarının saxlanıldığı obyektlər, eləcə də sahil radar sistemləri hədəfə alınıb.
