SEPAH ABŞ-ın 8 hərbi obyektinin vurulduğunu açıqladı
İran İnqilab Keşikçiləri Korpusu (SEPAH) bazar günü səhər yaydığı bəyanatda Hərbi Dəniz və Aerokosmik Qüvvələrin gecə saat 02:00–03:00 arasında birgə əməliyyat keçirdiyini açıqlayıb.
Bəyanata görə, ballistik raketlər və pilotsuz uçuş aparatları ilə həyata keçirilən hücum zamanı ABŞ ordusuna məxsus 8 mühüm hərbi obyekt hədəfə alınıb.
SEPAH bildirib ki, zərbələr Küveytdə yerləşən Əli Əl-Salim aviabazasına, həmçinin Bəhreyndəki Salman limanında yerləşən ABŞ Hərbi Dəniz Qüvvələrinin Beşinci Donanmasının qərargahına endirilib. İran tərəfi hədəflərin məhv edildiyini iddia edib.
İran: Bu, ABŞ-ın son hücumlarına cavabdır
Bəyanatda qeyd olunub ki, ABŞ gecə saatlarında İranın sahil bölgələrində yerləşən beş obyektə hücum edib. Vaşinqton bu əməliyyatı Hörmüz boğazında qaydaları pozduğu iddia edilən bir gəmiyə qarşı SEPAH-ın müdaxiləsi ilə əsaslandırıb.
İran isə bildirib ki, Hörmüz boğazında gəmiçiliyin tənzimlənməsi “İslamabad Memorandumu”na əsasən İranın məsuliyyətindədir və bundan sonra qaydaları pozan gəmilərə qarşı daha sərt tədbirlər görüləcək.
“ABŞ bazaları cəhənnəmi yaşayacaq” xəbərdarlığı
SEPAH bəyan edib ki, ABŞ və müttəfiqlərinin istənilən yeni hücumu, səbəbindən asılı olmayaraq, daha dağıdıcı cavabla qarşılanacaq.
İnqilab Keşikçilərinin Hərbi Dəniz Qüvvələrinin komandanlığı da ayrıca açıqlamasında ABŞ-ın Sirik bölgəsinə açdığı atəşin İranın Hörmüz boğazına nəzarətini dəyişdirə bilməyəcəyini bildirib.
Açıqlamada ABŞ-ın bölgədəki hərbi bazalarına da sərt xəbərdarlıq edilərək, onların yaxın günlərdə “çox ağır nəticələrlə üzləşəcəyi” iddia olunub.
ABŞ yeni əməliyyat keçirdiyini təsdiqləyib
ABŞ Mərkəzi Komandanlığı (CENTCOM) isə gecə saatlarında yaydığı məlumatda İrana qarşı əlavə zərbələr endirdiyini təsdiqləyib.
Vaşinqton bildirib ki, əməliyyat İranın bir neft tankerinə hücum etdiyini iddia etdiyi hadisəyə cavab olaraq həyata keçirilib.
CENTCOM-un açıqlamasına əsasən, hücumlar zamanı İranın hərbi müşahidə infrastrukturu, rabitə sistemləri, hava hücumundan müdafiə obyektləri, pilotsuz uçuş aparatlarının saxlanıldığı məntəqələr və dəniz minalarının yerləşdirilməsi imkanları hədəfə alınıb.
