“Vaşinqton Post”dan səs-küylü iddia: ABŞ informatorlarını Səlvadora qaytarmaq qarşılığında gizli razılaşma
ABŞ-ın “Vaşinqton Post” qəzeti xəbər verir ki, ABŞ dövlət katibi Marko Rubio Səlvador prezidenti Nayib Bukele ilə mart ayında baş tutan telefon danışığında ona “MS-13” adlı məşhur cinayətkar qrupun bəzi üzvlərini, o cümlədən ABŞ hökumətinin qoruması altında olan informatorları təhvil verməyi vəd edib.
Mənbələrin bildirdiyinə görə, bu təklif 13 mart tarixində baş tutan telefon danışığı zamanı səslənib. Həmin günlərdə Tramp administrasiyası Venesueladan gəlmiş yüzlərlə miqrantın Səlvadorun “Terrorçuların Saxlanma Mərkəzi” (CECOT) adlı ciddi rejimli həbsxanasına yerləşdirilməsi planı üzərində işləyirdi.
Danışıq zamanı prezident Bukele ABŞ-da saxlanılan “MS-13” bandası üzvlərindən doqquz nəfərin, o cümlədən ABŞ Ədliyyə Nazirliyi ilə əməkdaşlıq edən şəxslərin Səlvadora qaytarılmasını tələb edib. Lakin Rubio bildirib ki, həmin şəxslərdən bəziləri ABŞ-ın informatorlarıdır. Buna baxmayaraq, o, ABŞ baş prokuroru Pam Bondi ilə razılaşaraq bu qoruma proqramlarının ləğv edilə biləcəyini vəd edib.
Tramp administrasiyasının məqsədi: Bukeleni razı salmaq
Qəzetin məlumatına görə, bu vəd Tramp administrasiyasının Bukeleni razı salmaq üçün nə qədər irəli getməyə hazır olduğunu göstərir. Məhz bu razılaşma sayəsində ABŞ hakimiyyətinə Səlvadorun ən təhlükəli məhbuslarını saxlayan CECOT həbsxanasına çıxış imkanı yaradılıb.
Mənbələr bildirir ki, Bukele bu razılaşma ilə hökumətinin “MS-13” bandası ilə gizli sövdələşmələrini ifşa etməyə çalışan şəxsləri təhvil alıb. Bu addım Bukelenin “cinayətkarlığa qarşı sərt lider” imicini qorumaq və ABŞ-da aparılan istintaqı zəiflətmək məqsədi daşıyıb.
Lakin ABŞ Ədliyyə Nazirliyinin keçmiş və hazırkı rəsmiləri xəbərdarlıq ediblər ki, informatorların qoruma proqramının ləğvi illərlə davam edən əməliyyatları təhlükə altına sala bilər və hüquq-mühafizə orqanlarının etibarını ciddi şəkildə zədələyər.
“Bu, hüquq-mühafizə orqanlarına xəyanətdir”
ABŞ kontraktoru və “MS-13” üzrə araşdırmalarda iştirak etmiş Duqlas Frah bu addımı “hüquq-mühafizə orqanlarına xəyanət” adlandırıb:
“Agentlərimiz öz həyatlarını riskə ataraq bu bandanın üzvlərini ələ keçiriblər. İndi isə hökumət bu informatorları satır. Bundan sonra ABŞ ədliyyəsinə kim inanacaq?”
Məlumatlara görə, Bukelenin tələb etdiyi üç lider ABŞ-da onun hökumətindəki rəsmiləri ifşa edən dəlillər təqdim edib. Onlardan biri — Sesar Lopes Larios — telefon danışığından iki gün sonra Səlvadora göndərilib, digərləri isə hələ də ABŞ-da saxlanılır.
ABŞ Dövlət Departamenti müdafiə mövqeyində
ABŞ Dövlət Departamenti ittihamları rədd edərək bildirib ki, Rubio və komandasının diplomatik səyləri sayəsində yüzlərlə “Tren de Aragua” (TdA) bandası üzvü Səlvadora və oradan Venesuelaya deportasiya olunub. Departamentin sözçüsü Tomi Bigot deyib:
“Tramp administrasiyasının nəticələri özlüyündə danışır. Amerikalılar bu cəsarətli addımlar sayəsində daha təhlükəsizdir.”
Ədliyyə Nazirliyinin nümayəndəsi Qeyts MakQavik isə qeyd edib ki, ABŞ bu proseslərlə “MS-13” bandası ilə mübarizədə “misilsiz uğurlar” qazanıb.
Səlvador hökuməti isə “Vaşinqton Post”un hesabatına münasibət bildirməkdən imtina edib. Prezident Bukelenin tərəfdarı sayılan lobbiçi Demian Merlo isə iddiaları müdafiə edərək deyib:
“Bunlar Səlvadorlu terrorçulardır. Onların yeri Amerikadakı rahat həbsxanalar deyil, öz ölkələrinin antiterror mərkəzidir.”
Qəzet bildirir ki, material onlarla amerikalı və səlvadorlu rəsmilərin, hüquqşünasların, prokurorların və diplomatların ifadələrinə əsaslanır. Onların əksəriyyəti mövzunun həssaslığı səbəbindən adlarını açıqlamayıb.
