Dağıntılar altından çıxarılan 112 nəfər dəfn olundu
Qəzzada minlərlə fələstinli sionist rejim ordusunun davam edən hücumları zamanı həyatını itirən Əbu Şəriə və Əl-Həsaynə ailələrinin 112 üzvünün dəfn mərasimində iştirak edib.
Dağıntılar altından çıxarılan cəsədlər əvvəlcə Qəzza şəhərinin Əs-Sabra məhəlləsində, dağıdılmış evlərin arasında Fələstin bayraqlarına bükülmüş vəziyyətdə düzülüb. Daha sonra izdihamlı mərasimlə Şeyx Şaban qəbiristanlığına aparılaraq torpağa tapşırılıb.
Həlak olanların böyük hissəsi qadın və uşaqlardır
Ailə nümayəndəsi doktor Cəddu Əbu Şəriə bu mərasimi “müasir Fələstin tarixinin ən böyük dəfn mərasimi” adlandırıb.
Ağsaqqallardan Əli Əbu Şəriə bildirib ki, dəfn edilənlər arasında 44 uşaq, 37 qadın, 23 yaşlı şəxs və 7 əlilliyi olan insan var.
Hücumlar 2023-cü ilin oktyabrından başlayıb
Ailə nümayəndələrinin sözlərinə görə, ilk ağır hücum 2023-cü il oktyabrın 20-də həyata keçirilib. Beşmərtəbəli yaşayış binasının vurulması nəticəsində ailənin 14 üzvü həyatını itirib.
Ən dağıdıcı hücum isə 2023-cü il noyabrın 22-də Əs-Sabra məhəlləsində baş verib. Bildirilib ki, təxminən 300 nəfərin sığındığı yaşayış məhəlləsi güclü bombardmana məruz qalıb. Həmin vaxt onlarla insan həlak olub, 70 nəfər dəfn edilsə də, çoxsaylı cəsədlər uzun müddət dağıntılar altında qalıb və yalnız son günlər çıxarılıb.
Hücumlar sonrakı aylarda da davam edib
Məlumata görə, 2024-cü ilin mayında Əbu Salim Əbu Şəriəyə məxsus binaya endirilən zərbə nəticəsində daha 15 nəfər həlak olub.
2025-ci ilin avqustunda isə Qəzza şəhərindən köç etməyə çalışan ailə üzvlərinə edilən hücum nəticəsində səkkiz nəfər, o cümlədən uşaqlar həyatını itirib.
Ailə nümayəndələri bildiriblər ki, ölənlər arasında iş adamları, dövlət qulluqçuları, mülki şəxslər və xarici ölkə vətəndaşları da olub ki, bu da hücumların mülki əhalini hədəf aldığını göstərir.
Yüzlərlə ailə tamamilə məhv edilib
Əbu Şəriə ailəsi indiyədək 267 üzvünü dəfn etdiyini açıqlayıb. Daha 41 nəfərin taleyi isə naməlum olaraq qalır. Onların dağıntılar altında qaldığı və ya güclü partlayışlar nəticəsində cəsədlərinin parçalandığı ehtimal edilir.
Tibbi mənbələrin məlumatına görə, hücumlar nəticəsində 2 276 fələstinli ailə tamamilə məhv olub və həmin ailələrdən ümumilikdə 8 858 nəfər həlak olub. Bundan başqa, 2 348 ailədən yalnız bir nəfər sağ qalıb.
Şəhid olanların sayı 73 mini keçib
Mərasimdə çoxlu sayda sakinlə yanaşı, müharibə zamanı böyük itkilər vermiş digər fələstinli ailələrin nümayəndələri də iştirak ediblər.
Tibbi mənbələrin məlumatına əsasən, 2023-cü il oktyabrın 7-dən bəri Qəzzada davam edən hücumlar nəticəsində 73 mindən çox fələstinli həyatını itirib. On minlərlə insan yaralanıb və ya itkin düşüb, bölgədə bombardman, aclıq və genişmiqyaslı dağıntılar davam edir.
