İran müharibəsinin iqtisadi yükü artır
ABŞ-də aparılan hesablamalara əsasən, İran müharibəsinin yaratdığı iqtisadi nəticələr ölkədə hər ailənin büdcəsinə orta hesabla 1000 dollar əlavə yük gətirib.
Qiymətləndirməyə görə, yanacaq və ərzaq qiymətlərinin bahalaşması, kredit faizlərinin yüksəlməsi, aviabiletlərin bahalaşması və müharibənin maliyyələşdirilməsi üçün dövlət xərclərinin artması Amerika vətəndaşlarının gündəlik xərclərinə birbaşa təsir göstərib.
Ən böyük xərc yanacaq və ərzaqdan yaranıb
Məlumatda bildirilir ki, ailə büdcəsinə düşən əlavə yükün təxminən 300 dolları benzinin bahalaşması ilə bağlıdır. Müharibə dövründə ABŞ-də benzinin qiyməti bir qallon üçün 4,56 dollara qədər yüksəlib.
Dizel yanacağının bahalaşması isə nəqliyyat xərclərini artıraraq ərzaq məhsullarının qiymətlərinə təsir edib. Nəticədə hər ailənin ərzaq xərcləri orta hesabla 200 dollar artıb.
Faizlər və aviabiletlər də bahalaşıb
Müharibənin yaratdığı iqtisadi təzyiqlər fonunda faiz dərəcələrinin yüksəlməsi ailələrə əlavə 150 dollar maliyyət yaradıb.
Reaktiv yanacağın bahalaşması isə aviabilet qiymətlərinə təsir göstərərək orta hesabla 100 dollarlıq əlavə xərc formalaşdırıb.
Vergi ödəyicilərinin yükü 113 milyard dolları keçib
Hesabatda qeyd olunur ki, hər ailənin əlavə yükünün 250 dolları müharibənin maliyyələşdirilməsi üçün artan dövlət xərcləri və vergi öhdəlikləri ilə əlaqədardır.
“Iran War Cost Tracker” platformasının məlumatına görə, ABŞ vergi ödəyicilərinin İran müharibəsinə görə indiyədək ödədiyi ümumi məbləğ 113,3 milyard dollara çatıb. Bildirilir ki, müharibənin maliyyələşdirilməsi üçün vergi ödəyicilərinin hesabına hər gün təxminən 50 milyon dollar xərclənir.
Pentaqon rekord büdcə istəyir
Müharibənin iqtisadi təsirləri davam etdiyi bir vaxtda ABŞ Müdafiə Nazirliyi 2027-ci maliyyə ili üçün 1,5 trilyon dollarlıq rekord həcmdə müdafiə büdcəsi tələb edib.
Ekspertlər bildirirlər ki, Hörmüz boğazında vəziyyət hələ də tam sabit deyil. Onların fikrincə, mövcud atəşkəs kövrək xarakter daşıyır və bölgədə yaranacaq yeni gərginlik həm qlobal enerji bazarlarına, həm də ABŞ iqtisadiyyatına əlavə təzyiq göstərə bilər.
