Hula bölgəsində yeni təxribat
İsrail ordusu Livanın cənubundakı Hula şəhəri yaxınlığında iki evdə partlayıcı qurğular yerləşdirərək onları partladıb. Məlumatı livanlı jurnalist Xəlil Nəsrallah yayıb. Onun sözlərinə görə, İsrail əsgərləri Hulanın şimal-şərqində yerləşən Subeyh təpəsinə daxil olaraq evlərdə partlayıcı maddələr yerləşdirib və uzaqdan partlayış törədiblər.
Nəsrallah bildirib ki, hadisə Livan ordusunun nəzarətində olan yeganə sərhəd məntəqəsinin yaxınlığında baş verib. O, livanlı hərbçilərin bu hadisəyə görə qınanmamalı olduğunu vurğulayıb: “Onların qanı qiymətlidir, məsuliyyət isə əmri verənlərdədir.”
Tənqid: “Ordu zəif mövqedə saxlanılır”
Jurnalist Livan hakimiyyətini sərt tənqid edərək bildirib ki, “İsrailin təxribatlarına qarşı ordunun sərhəd bölgələrində möhkəmləndirilməməsi ciddi strateji səhvdir”.
Hadisə son həftələrdə İsrail ordusunun Livanın cənubuna qarşı demək olar ki, hər gün həyata keçirdiyi hava hücumları fonunda baş verib.
Atəşkəsə baxmayaraq hücumlar davam edir
Xatırladaq ki, 27 noyabr 2024-cü ildə İsrail “Hizbullah”la döyüşlərdə ağır itkilər verərək atəşkəsi qəbul etməyə məcbur qalmışdı. Lakin buna baxmayaraq, sionist rejim ordusu Livan ərazisinə hücumlarını dayandırmayıb və demək olar ki, hər gün hava zərbələri endirir.
Hazırda İsrail qüvvələri Livan ərazisində beş müxtəlif nöqtədə mövqelərini saxlayır və cənub, şərq bölgələri, eləcə də paytaxt Beyrutun cənub kənarlarını atəşə tutur.
Livan hökumətinin məlumatına əsasən, noyabr atəşkəsindən bu yana İsrailin hücumları nəticəsində azı 300 nəfər həlak olub, 650-dən çox insan, o cümlədən qadınlar və uşaqlar yaralanıb.
“ABŞ təcavüzü himayə edir”
“Hizbullah”ın baş katibi Şeyx Nəim Qasim ötən cümə ABŞ-ın rolunu tənqid edərək Vaşinqtonu “neytral vasitəçi deyil, təcavüzün sponsoru” adlandırıb.
ABŞ-da fəaliyyət göstərən “Quincy Institute for Responsible Statecraft” təşkilatının hesabatına görə, sabiq prezident Co Bayden İsrailə Livanı bombalamağa davam etməyə icazə verib, baxmayaraq ki, Vaşinqton rəsmi olaraq atəşkəsin zəmanətçisi kimi çıxış edirdi.
Hesabatda qeyd olunur ki, İsrailin keçmiş ABŞ səfiri Maykl Hersoq “Yaxın Şərq Siyasəti üzrə Vaşinqton İnstitutu”nda (WINEP) keçirilən konfransda Tel-Əvivin Bayden administrasiyası ilə “səssiz razılaşma” əldə etdiyini açıqlayıb. Bu razılaşmaya əsasən, İsrail atəşkəsə baxmayaraq Livanı bombalamaqda davam edə bilərdi.
