İran təyyarəsinin uçuşu dayandırılıb
Cənubi Yəmənin separatçı administrasiyası İranın “Mahan Air” aviaşirkətinə məxsus sərnişin təyyarəsinin Ənsarullah hərəkatının nəzarətində olan Səna Beynəlxalq Hava Limanına enişinə icazə vermədiyini açıqlayıb.
Separatçı administrasiyanın dövlət televiziyasının yaydığı məlumata görə, nəqliyyat naziri Möhsin əl-Öməri bildirib ki, uçuş üçün zəruri rəsmi icazələr alınmadığından təyyarənin Sənaya hərəkəti dayandırılıb.
Təyyarə geri qayıtmağa məcbur olub
Nazirin sözlərinə görə, təyyarə Oman hava məkanında olduğu vaxt Səna istiqamətində uçuşunu davam etdirməsinə icazə verilməyib və geri qayıtmalı olub.
İran rəsmiləri və Ənsarullah hərəkatı hadisə ilə bağlı hələlik rəsmi açıqlama verməyiblər.
Oxşar hadisə bir həftə əvvəl də yaşanmışdı
Separatçı Cənubi Yəmən administrasiyası təxminən bir həftə əvvəl də İrana məxsus başqa bir təyyarənin Səna hava limanına enişinin qarşısını aldığını bildirmişdi.
Məlumata görə, son həftələrdə Cənubi Yəmən administrasiyası ilə İranın dəstəklədiyi Ənsarullah hərəkatı arasında “İran təyyarələri” ilə bağlı gərginlik daha da artıb.
Gərginlik hərbi ritorikanı gücləndirib
Bundan əvvəl separatçı administrasiya İran təyyarəsinin Səna hava limanına enməsinin qarşısını almaq məqsədilə uçuş-eniş zolağını hədəfə aldığını açıqlamışdı. Həmin təyyarə marşrutunu dəyişərək ölkənin qərbində yerləşən Hudeydə hava limanına enmişdi.
Bu hadisədən sonra tərəflər arasında qarşılıqlı sərt bəyanatlar səsləndirilib. Ənsarullah ümumi səfərbərlik elan edib, Cənubi Yəmənin Prezident Şurası isə hərəkat əleyhinə hərbi variantın gündəmdə olduğunu bəyan edib.
Təxminən son dörd ildə böyük ölçüdə qorunan kövrək atəşkəs İran təyyarələri ətrafında yaranmış gərginlik səbəbindən yenidən ciddi sınaq qarşısında qalıb.
