Peyk görüntüləri yayımlandı
İran mediası İordaniyada yerləşən Müvəffəq əl-Səlti (Əzraq) aviabazasına aid yeni peyk görüntülərini dərc edib.
Yayımlanan görüntülərdə bazadakı döyüş təyyarələri üçün nəzərdə tutulmuş sığınacağın dağıldığı əks olunub. İran tərəfi bunun İran Silahlı Qüvvələrinin həyata keçirdiyi dəqiq raket zərbəsinin nəticəsi olduğunu bildirib.
Hərbi obyektlər hədəfə alınıb
İran İslam İnqilabı Keşikçiləri Korpusu daha əvvəl Hərbi Hava-Kosmik Qüvvələrinin “Nəsr 2” əməliyyatının 20-ci mərhələsi çərçivəsində Müvəffəq əl-Səlti aviabazasına raket və pilotsuz uçuş aparatları ilə zərbələr endirdiyini açıqlamışdı.
Məlumata görə, əməliyyat zamanı döyüş təyyarələrinin sığınacaqları və iri aviasiya dayanacağı hədəfə alınıb. İran iki qırıcı təyyarənin tamamilə məhv edildiyini, daha üç ABŞ hərbi təyyarəsinin zədələndiyini açıqlayıb.
ABŞ raket hücumunda itkiləri təsdiqləyib
ABŞ Mərkəzi Komandanlığı (CENTCOM) İordaniyada yerləşən hərbi bazaya edilən hücum nəticəsində iki ABŞ hərbçisinin həlak olduğunu, bir nəfərin itkin düşdüyünü rəsmən təsdiqləyib.
Bundan əvvəl ABŞ rəsmiləri də İranın raket imkanlarının inkişaf etdiyini, yeni raketlərin yüksək sürətlə hərəkət etdiyini və son mərhələdə manevr edərək hava hücumundan müdafiə sistemlərini aşa bildiyini bildirmişdilər.
Digər ABŞ bazaları da hədəfə alınıb
ABŞ-ın Fox News televiziya kanalının məlumatına görə, İranın Küveyt, Bəhreyn və İordaniyada yerləşən ABŞ hərbi bazalarına endirdiyi zərbələr nəticəsində azı 13 ABŞ hərbçisi yaralanıb.
Bundan başqa, Sputnik agentliyinə danışan məlumatlı mənbə Müvəffəq əl-Səlti aviabazasının ABŞ-ın İrana qarşı həyata keçirdiyi hərbi əməliyyatlarda əsas regional baza kimi istifadə olunduğunu bildirib.
İran bəyan edib ki, bölgədə yerləşən ABŞ hərbi bazalarına endirilən zərbələr ABŞ-ın İranın cənub bölgələrinə qarşı həyata keçirdiyi hücumlara cavab xarakteri daşıyır.
