Rubio: Razılaşma yaxın ola bilər
ABŞ dövlət katibi Marko Rubio bildirib ki, Hörmüz boğazı ilə bağlı yekun razılıq hələ əldə olunmasa da, tərəflər razılaşmaya çox yaxınlaşıblar.
Onun sözlərinə görə, İranla aparılan danışıqlarda mühüm irəliləyiş əldə edilib və Vaşinqton yaxın vaxtlarda razılaşmanın imzalanacağına ümid edir.
Oman vasitəçilik edir
Rubio qeyd edib ki, hazırda İran və Oman arasında Hörmüz boğazından daha çox gəminin təhlükəsiz keçidini təmin etmək məqsədilə dialoq davam edir.
ABŞ dövlət katibi bildirib ki, bu danışıqların əsas məqsədi yaxın dövrdə beynəlxalq gəmiçiliyin təhlükəsizliyini təmin etməkdir.
ABŞ üçün əsas prioritet
Marko Rubio vurğulayıb ki, Hörmüz boğazında gəmiçiliyin bərpası ABŞ üçün ən vacib məsələlərdən biridir.
Bununla yanaşı, o əlavə edib ki, Vaşinqtonun əsas strateji məqsədi İranın nüvə proqramından imtina etməsidir.
İran plan üzərində işləyir
Bundan əvvəl “Reuters” agentliyi yüksək rütbəli iranlı mənbəyə istinadən xəbər vermişdi ki, Tehran Omanla Hörmüz boğazının yenidən açılması planını müzakirə edir.
Məlumata görə, plan boğaza daxil olan gəmi marşrutuna İranın nəzarət etməsini, çıxan gəmilərin monitorinqini və zərurət yaranacağı təqdirdə müdaxilə imkanını nəzərdə tutur.
Tehran: Təhlükəsiz marşrut müvəqqəti olacaq
İran Xarici İşlər Nazirliyinin sözçüsü və danışıqlar heyətinin üzvü İsmayıl Bəqayi də bildirib ki, Omanla aparılan danışıqlar Hörmüz boğazında təhlükəsiz keçid marşrutunun müəyyənləşdirilməsinə yönəlib.
Onun sözlərinə görə, nəzərdə tutulan marşrut müvəqqəti xarakter daşıyacaq və İran həmin mexanizm vasitəsilə boğazda gəmiçiliyin davamlılığını təmin edəcək.
