Ağ Evdə fikir ayrılığı
Axios portalının məlumatına görə, ABŞ Prezidenti Donald Trumpın yaxın çevrəsində İrana qarşı mümkün hərbi əməliyyat məsələsində ciddi fikir ayrılığı yaranıb.
Portal respublikaçı senator Lindsi Qrema istinadən yazır ki, Trampa yaxın bəzi şəxslər onu İrana zərbə endirməməyə çağırır. Qrem isə prezidentə bu səsləri nəzərə almamağı tövsiyə edib.
Məlumata görə, Tramp hələ yekun qərar verməyib. Bununla belə, iki aviadaşıyıcının və yüzlərlə hərbi təyyarənin mümkün genişmiqyaslı əməliyyata hazırlıqlı vəziyyətə gətirildiyi bildirilir.
Hərbi ssenarilər masadadır
Ali rəhbərliyin hədəf alınması variantı
“Axios” qeyd edir ki, prezidentə təqdim olunan variantlar arasında İranın ali rəhbəri Seyid Əli Xameneini və onun oğlunun hədəf alınması kimi ssenarilər də yer alıb.
Qrem bu həftə Yaxın Şərqə səfər edərək İsrail rəsmiləri ilə İran məsələsini müzakirə edib və “tarixi dəyişiklik” üçün fürsət yarandığını iddia edib. Bununla yanaşı, Trampın ətrafında hərbi müdaxilənin riskləri və mümkün nəticələri barədə narahat səslər də artmaqdadır.
Təmkin çağırışları və iqtisadi narahatlıq
Bəzi müşavirlər isə hərbi addım əvəzinə təhdid kartından danışıqlarda təzyiq vasitəsi kimi istifadə etməyi tövsiyə edir. Onlar genişmiqyaslı müharibənin siyasi və iqtisadi nəticələrinin ağır ola biləcəyini vurğulayırlar.
Reuters agentliyinin məlumatına görə, Trampın ətrafında olan bəzi şəxslər hərbi eskalasiyanın inflyasiya və yaşayış xərcləri ilə bağlı gündəliyi kölgədə qoya biləcəyindən ehtiyat edir. Xüsusilə aralıq seçkilər ərəfəsində iqtisadi mövzuların seçicilər üçün prioritet olduğu qeyd olunur.
Məhdud elastiklik siqnalı
Eyni zamanda, ABŞ tərəfi İranla danışıqlarda məhdud elastiklik nümayiş etdirə biləcəyinə işarə edib. Yüksək vəzifəli mənbə “Axios”a bildirib ki, Vaşinqton İranın simvolik uran zənginləşdirməsini nəzərdə tutan təklifini, nüvə silahına aparan yolun tam bağlanması şərti ilə nəzərdən keçirə bilər.
Beləliklə, Ağ Evdə İran siyasəti ilə bağlı yekdil mövqe formalaşmayıb və qərarın hansı istiqamətdə olacağı hələlik qeyri-müəyyən qalır.
