Sionist İsrail ordusu Qəzza zolağının şimalında İndoneziya xəstəxanasının dağıdılmasına başlayıb. Binada ən azı 55 nəfərin sıxıldığı bildirilir.
Az.rasthaber.com xəbər verir ki, Əl-Cəzirə televiziyasının məlumatına görə, sionist İsrail ordusu Qəzza zolağının şimalında sonuncu səhiyyə müəssisəsi olan İndoneziya xəstəxanasını sökməyə başlayıb.
“İsrail əsgərləri xəstəxananın darvazasına hücum edib və buldozerlə mühasirəyə alınan obyektin şimal divarını dağıdıblar”, - deyə məlumatda bildirilir.
Verilən məlumata görə, xəstəxana binasında 4-ü həkim, 8-i tibb bacısı olmaqla azı 55 nəfər qalır. Xəstəxananın ətrafında silah səslərinin eşidildiyi bildirilir.
Qəzzanın Səhiyyə Nazirliyindən əvvəlki açıqlamada, mayın 13-də Qəzza-Avropa xəstəxanasını bombardmanla istismardan çıxardıqdan sonra sionist İsrail ordusunun İndoneziya xəstəxanasına hücumlarını artırdığı və xəstələrdən 2-nin xəstəxanadan çıxarkən yaralandığı qeyd edilib.
Nazirlikdən verilən başqa bir açıqlamada Beyt Hanun və Kamal Advan xəstəxanalarının dağıdılması və İndoneziya xəstəxanasına edilən hücumlar nəticəsində Qəzzanın şimalındakı bütün dövlət xəstəxanalarının xidmətdən çıxdığı bildirilib.
