Sosial şəbəkələrlə bağlı ciddi ittiham
İnsan Hüquqları Müşahidə Təşkilatı Kolumbiyadakı silahlı qrupların uşaqları öz sıralarına cəlb etmək məqsədilə hazırladığı məzmunların sosial şəbəkələrdə yayılmasının qarşısının lazımi səviyyədə alınmadığını bildirib.
Təşkilatın hesabatında qeyd olunur ki, bəzi hallarda sosial şəbəkələrin işləmə mexanizmləri bu cür paylaşımların daha geniş auditoriyaya çatmasına şərait yaradırmış kimi görünür.
Hesabata əsasən, silahlı qruplar uşaqlar və yeniyetmələr üçün cəlbedici görünə biləcək paylaşımlar hazırlayaraq öz sıralarındakı həyatı olduğundan daha yaxşı göstərməyə çalışırlar. Bununla yanaşı, aldadıcı iş təkliflərindən də istifadə edildiyi bildirilir.
2021-ci ildən təxminən 1500 uşaq cəlb edilib
Təşkilatın məlumatına görə, 2021-ci ildən bəri Kolumbiyada təxminən 1500 uşaq silahlı qrupların sıralarına cəlb olunub.
Hesabatda həmin uşaqların döyüşlərdə iştirak etdiyi, silah, pilotsuz uçuş aparatları və partlayıcı vasitələrlə işləməyə məcbur edildiyi bildirilir. Onlardan kəşfiyyat məlumatlarının toplanmasında da istifadə olunur.
Döyüş hazırlığı olmayan bəzi uşaqların isə birbaşa təhlükəli bölgələrə göndərildiyi və faktiki olaraq ölüm təhlükəsi ilə üz-üzə qoyulduğu vurğulanır.
Yerli uşaqlar daha böyük təhlükə altındadır
Hesabatda diqqət çəkən məqamlardan biri silahlı qruplara cəlb olunan uşaqların sosial mənşəyidir.
Məlumata əsasən, onların təxminən yarısını yerli xalqların nümayəndələri təşkil edir. Halbuki yerli əhalinin Kolumbiyanın ümumi əhalisindəki payı təxminən 4 faizdir.
Silahlı qruplara cəlb edilən uşaqların təxminən 40 faizinin qızlar olduğu da bildirilir. Hesabatda qızların xüsusilə cinsi zorakılıq təhlükəsi ilə üzləşdiyi vurğulanır.
Pul və dəbdəbəli həyat görüntüləri ilə aldadırlar
Araşdırmaya görə, silahlı qruplar sosial şəbəkələrdə təbliğat apararkən pul, zinət əşyaları və düşərgə həyatını nümayiş etdirən görüntülərdən istifadə edirlər.
Paylaşımlarda Meksikanın narkotik alverçilərinin həyatını tərənnüm edən musiqilərdən də istifadə olunduğu qeyd edilir. Məqsəd silahlı qruplardakı həyatı gənclər üçün təhlükəli fəaliyyət deyil, asan qazanc və güc əldə etmək vasitəsi kimi təqdim etməkdir.
Münaqişə qurbanı olan uşaqlarla məşğul olan təşkilatlardan birinin təsisçisi Metyu Çarlzın sözlərinə görə, silahlı qruplar sosial şəbəkələrdə müəyyən həyat tərzini peşəkar şəkildə təbliğ etməyi bacarırlar. Burada sərt güc nümayişi və asan pul qazanmaq vədi əsas vasitələrdən biri kimi istifadə olunur.
Silahlı qrupların payı açıqlandı
İnsan Hüquqları Müşahidə Təşkilatının məlumatına görə, 2021-2025-ci illər arasında sənədləşdirilmiş uşaq cəlbetmə hallarının 74 faizinə görə Kolumbiya İnqilabçı Silahlı Qüvvələrindən ayrılmış qruplar məsuliyyət daşıyıb.
Təşkilat aşkarladığı müvafiq məzmunlar barədə sosial şəbəkələri idarə edən şirkətləri məlumatlandırıb. Şirkətlər isə göstərilən materialların platformalardan silindiyini açıqlayıblar.
Sosial şəbəkə rəhbərlikləri uşaqların cəlb edilməsinə qarşı mübarizə tədbirlərinin gücləndirildiyini və qanunsuz silahlı, eləcə də mütəşəkkil cinayətkar qrupların azyaşlıları hədəfə almasının qarşısının alınması üçün tədbirlər görüldüyünü bildiriblər.
Kolumbiyada silahlı qarşıdurmalar davam edir
Kolumbiyada 2016-cı ildə imzalanmış sülh razılaşması təxminən yarım əsr davam edən silahlı münaqişənin mühüm mərhələsini başa çatdırsa da, ölkədə təhlükəsizlik problemi tam aradan qalxmayıb.
Müxtəlif silahlı qruplar xüsusilə ölkənin şimal-şərq və cənubundakı ucqar ərazilərdə fəaliyyətlərini davam etdirirlər. Yeni hesabat isə münaqişənin uşaqlar üçün yaratdığı təhlükənin artıq döyüş bölgələri ilə məhdudlaşmadığını, sosial şəbəkələrə də keçdiyini göstərir.
