İran hərbi mənbəsindən ABŞ-yə sərt xəbərdarlıq
İranın Tasnim xəbər agentliyinin istinad etdiyi hərbi mənbə bildirib ki, ABŞ İranın infrastruktur obyektlərini hədəfə alarsa, Tehran buna bölgədə yerləşən strateji infrastruktur və enerji obyektlərinə zərbələrlə cavab verəcək.
Açıqlama ABŞ Prezidenti Donald Trampın İranın hər hansı gəmiyə hücum edəcəyi təqdirdə ölkədə körpülərin və elektrik stansiyalarının vurulacağı ilə bağlı bəyanatından sonra səsləndirilib.
Hörmüz boğazı ilə bağlı mövqe dəyişməyib
Hərbi mənbənin sözlərinə görə, İran Hörmüz boğazı üzərində suveren hüquqlarını həyata keçirməkdə qətiyyətlidir və boğazın yenidən ölkənin təhlükəsizliyi üçün təhdid mənbəyinə çevrilməsinə imkan verməyəcək.
Bildirilib ki, gəmilərin bu strateji su yolundan keçidi yalnız İranın müəyyən etdiyi qaydalar və koordinasiya çərçivəsində təhlükəsiz hesab olunur.
“Enerji obyektləri də hədəf olacaq”
Tasnim-in yaydığı məlumata görə, İranlı hərbi mənbə ABŞ-nin İran ərazisində körpü və ya elektrik stansiyalarını vuracağı halda, Tehranın bölgədə ABŞ maraqları ilə əlaqəli körpüləri, infrastruktur obyektlərini və enerji müəssisələrini hədəfə alacağını bildirib.
Mənbə bu addımın mümkün hücumlara cavab xarakteri daşıyacağını vurğulayıb.
“İran istənilən hədəfi vura bilər”
Hərbi mənbə qeyd edib ki, son on gün ərzində baş verən hadisələr İranın istədiyi hədəfləri vurmaq imkanına malik olduğunu nümayiş etdirib.
Onun sözlərinə görə, ABŞ-nin yeni hərbi addımları Vaşinqton üçün əlavə siyasi və hərbi problemlər yarada bilər.
Son günlər ABŞ ilə İran arasında qarşılıqlı bəyanatlar və hərbi gərginlik davam edir. Tərəflər bir-birini mümkün eskalasiya ilə bağlı xəbərdar edir.
