ABŞ və Səudiyyə arasında nüvə sazişi imzalanıb
ABŞ Energetika Nazirliyi Reuters agentliyinə istinadən yayılan məlumatda ABŞ və Səudiyyə Ərəbistanının nüvə enerjisi sahəsində əməkdaşlıq haqqında saziş, eləcə də ikitərəfli təminat razılaşması imzaladığını açıqlayıb.
Nazirliyin məlumatına görə, bu sənədlər tərəflər arasında onillikləri əhatə edəcək və milyardlarla dollar dəyərində qiymətləndirilən strateji əməkdaşlığın hüquqi bazasını formalaşdırır.
Strateji və iqtisadi tərəfdaşlıq hədəflənir
ABŞ Energetika Nazirliyi bildirib ki, sazişlərin əsas məqsədi iqtisadi və strateji əməkdaşlığı genişləndirmək, eyni zamanda nüvə silahlarının yayılmaması ilə bağlı beynəlxalq standartlara sadiqliyi gücləndirməkdir.
Rəsmi Vaşinqton razılaşmaların mülki nüvə energetikasının inkişafına xidmət edəcəyini vurğulayıb.
Reuters: Saziş Konqresə təqdim ediləcək
Reuters daha əvvəl məlumat vermişdi ki, Donald Tramp administrasiyası yaxın günlərdə Səudiyyə Ərəbistanı ilə nüvə texnologiyalarının paylaşılmasını nəzərdə tutan sənədi ABŞ Konqresinə təqdim etməyi planlaşdırır.
Məlumata görə, söhbət ABŞ-ın 1954-cü il Atom Enerjisi Aktının 123-cü maddəsi əsasında hazırlanan sazişdən gedir.
Sənəd ABŞ-nin energetika naziri Kris Rayt və Səudiyyə Ərəbistanının energetika naziri Əbdüləziz bin Salman tərəfindən imzalanıb.
Mübahisə doğuran müddəalar
Reuters-in məlumatına görə, razılaşmada əvvəllər Vaşinqtonun vacib hesab etdiyi bəzi məhdudiyyətlər yer almır.
Belə ki, sənəddə Səudiyyə Ərəbistanının uranı zənginləşdirməməsi və işlənmiş nüvə yanacağını yenidən emal etməməsi ilə bağlı “qızıl standart” kimi tanınan öhdəliklərin olmadığı bildirilir.
Ekspertlər qeyd edirlər ki, bu proseslər nəzəri baxımdan nüvə silahı istehsalı üçün istifadə oluna biləcək texnologiyalar sırasına daxildir.
Konqresdə 90 günlük baxış mərhələsi
ABŞ qanunvericiliyinə əsasən, “123-cü maddə” üzrə sazişlər Konqresə təqdim edildikdən sonra təxminən 90 günlük baxış müddətinə çıxarılır.
Bu müddətdə qanunvericilər sənədə etiraz edə bilərlər. Etiraz olmadığı halda razılaşma avtomatik qüvvəyə minir.
