Məskunlaşanların hücumları zeytun mövsümünü hədəfə alıb
Şənbə günü Qərb sahilinin Nablus və Ramallah bölgələrində israilli məskunlaşanlar zeytun yığımı ilə məşğul olan fələstinli kəndlilərə hücum ediblər. Bu hadisə bölgədə mövsümün başlanğıcı ilə üst-üstə düşən və getdikcə artan zorakılıqlar fonunda baş verib.
Fələstin xəbər agentliyi “Vəfa”nın məlumatına görə, məskunlaşanlar kəndlilərə qarşı odlu silahdan atəş açıb və onlara fiziki zor tətbiq ediblər. Məqsəd – fələstinliləri öz torpaqlarına daxil olmağa maneə törətmək olub. Hadisə zamanı İsrail ordusu bölgədə yerləşərək məskunlaşanlara faktiki himayə göstərib.
Zeytun yığım mövsümündə İsrail qüvvələri fələstinlilərin kənd təsərrüfatı fəaliyyətini məhdudlaşdırmaq, torpaq sahələrinə girişi çətinləşdirmək və kənd təsərrüfatına ziyan vurmaqla ittiham olunur.
Xəbronda gənc yaralanıb, 6 nəfər saxlanılıb
Eyni gün səhər saatlarında İsrail ordusunun Xəbron vilayətində həyata keçirdiyi reydlər zamanı bir fələstinli gənc odlu silah yarası alıb, 6 nəfər – o cümlədən iki qadın – saxlanılıb.
“Vəfa”nın yerli mənbələrə istinadən verdiyi xəbərə görə, gənc Əd-Dura qəsəbəsinin yaxınlığındakı Ət-Tibə kəndində evinin qarşısında olarkən İsrail əsgərləri tərəfindən ayağından vurulub. Hadisədən sonra təcili tibbi yardım əraziyə buraxılmayıb və gənc təxminən bir saat qan içində qalıb. Daha sonra Fələstin Qırmızı Aypara Cəmiyyətinin əməkdaşları yaralını Dura Dövlət Xəstəxanasına çatdıra biliblər.
İsrail qüvvələri həmçinin Durada Əhməd Məhəmməd Həmdanı, Bəni Nəimdə Mustafa İsam Mnasirə, Həzəm Abdullah Mnasirə və Əla Məhəmməd Ğəribi, Xəbron şəhərindən Ənis Əbdülvüdud Ğeysi, Təfuh qəsəbəsindən isə İsrə Xəmayisəni həbs edib.
Reydlər zamanı evlərə basqınlar təşkil olunub, əmlak dağıdılıb və bəzi ailələrə məxsus pul vəsaitlərinə əl qoyulub.
Yollar bağlanıb, hərbi nəzarət gücləndirilib
Hadisələrdən sonra İsrail ordusu Xəbron vilayətində bir neçə əsas və ikinci dərəcəli yolu dəmir qapılar, beton baryerlər və torpaq sədləri ilə bağlayıb. Şəhərin və ətraf qəsəbələrin giriş-çıxış məntəqələrində hərbi nəzarət postları qurulub, fələstinlilərin gediş-gəlişi ciddi şəkildə məhdudlaşdırılıb.
Bütün bu tədbirlər fonunda bölgədə gərginliyin artdığı və fələstinlilərin gündəlik həyatının iflic vəziyyətə düşdüyü bildirilir.
