Zübdində İsrail dron hücumu: iki mülki şəxs həyatını itirdi
Bu gün Cənubi Livanın Nəbtə vilayətinə bağlı Zübdin qəsəbəsində İsrail pilotsuz uçuş aparatının (PUA) həyata keçirdiyi hücum nəticəsində bir kişi və həyat yoldaşı şəhid olub, daha bir nəfər yaralanıb. Hadisə barədə məlumatı “Əl-Məyadin” telekanalının müxbiri yayıb.
Mənbənin bildirdiyinə görə, hücum birbaşa olaraq yaşayış məntəqəsində hərəkətdə olan avtomobili hədəfə alıb. Hadisə yerində güclü partlayış baş verib və avtomobil tamamilə yanaraq yararsız vəziyyətə düşüb. Yaralı şəxs yaxınlıqdakı xəstəxanaya çatdırılıb.
İsrail ordusu Livanın şərqinə də zərbələr endirib
Hadisə ilə eyni vaxtda İsrail Hərbi Hava Qüvvələri Livanın şərqində yerləşən Hirmil dağlıq bölgəsindəki Zəğrin kəndi ətrafına da bir neçə hava zərbəsi endirib. “Əl-Məyadin”in Bəqəa bölgəsindəki müxbirinin məlumatına görə, zərbələr əsasən dağlıq və meşəlik əraziləri hədəf alıb.
İsrail son aylarda Livanın müxtəlif bölgələrinə qarşı hava və artilleriya hücumlarını intensivləşdirib. Bu hücumların çoxu Livan ərazisindəki mülki infrastrukturu və yaşayış yerlərini hədəfə alır.
BMT: 2024-cü ilin noyabrından bəri 100-dən çox mülki şəxs həlak olub
Xatırladaq ki, 2024-cü il noyabrın 27-də imzalanan atəşkəs sazişindən sonra belə, İsrail ordusu Livanın hava, dəniz və quru sərhədlərini dəfələrlə pozub. Birləşmiş Millətlər Təşkilatı bir neçə gün əvvəl açıqlayıb ki, atəşkəsin qüvvəyə minməsindən bəri İsrailin hücumları nəticəsində Livanda azı 103 mülki şəxs həyatını itirib.
Livan rəsmiləri beynəlxalq ictimaiyyəti İsrailin təcavüzkar hərəkətlərinə son qoymağa çağırır və atəşkəsin pozulmasının bölgədə yeni gərginlik dalğası yarada biləcəyini bildirirlər.
