Silah ixracı qadağasına baxmayaraq yeni təsdiq
Almaniya hökuməti avqust ayında elan etdiyi qismən silah ixracı qadağasına baxmayaraq, İsrailə silah satışını davam etdirib. İqtisadiyyat Nazirliyinin Sol Partiyanın sorğusuna verdiyi cavaba əsasən, 8 avqust – 22 sentyabr tarixləri arasında İsrailə ən azı 2,46 milyon avro dəyərində hərbi təchizat ixracına icazə verilib.
Hökumət bunun “yalnız digər hərbi avadanlıqlara aid olduğunu, döyüş silahlarını əhatə etmədiyini” iddia edib.
Önəmli artım
Berlinin məlumatına görə, 2025-ci ilin 1 yanvar – 8 avqust tarixləri arasında Alman müdafiə sənayesi şirkətlərinə İsrailə təxminən 250 milyon avro dəyərində silah ixrac etməyə icazə verilib. Bu, Almaniyanın 2023-cü ildə İsrailə verdiyi 327 milyon avroluq silah satış icazəsinin davamı hesab olunur. Həmin il ixrac 2022-ci illə müqayisədə 10 dəfə artmışdı.
Müxalifətin reaksiyası
Sol Partiya nümayəndəsi Lea Reysner hökuməti sərt tənqid edərək, onun alman cəmiyyətini aldatdığını bildirib:
“Hökumət ixracatı dayandırdığını deyir, amma milyonlarla avro dəyərində hərbi lisenziyanı təsdiqləməyə davam edir.”
Almaniyanın İsrail siyasəti
Almaniya uzun illərdir İsrailin əsas tərəfdaşlarından biri kimi çıxış edir. Rəsmi Berlin bu dəstəyi ölkənin Nazi keçmişi və Holokostdan doğan “tarixi məsuliyyəti” ilə əsaslandırır.
Silah ixracı ilə bağlı qərarlar Almaniya İqtisadiyyat və İqlim Qoruma Nazirliyi, Xarici İşlər Nazirliyi və Federal İxracat Nəzarəti İdarəsinin iştirakı ilə qəbul olunur. Xüsusi hallarda isə Baş nazirin rəhbərlik etdiyi Federal Təhlükəsizlik Şurası da bu prosesə qoşulur.
Gizli marşrutlar məsələsi
Almaniyanın üçüncü ölkələr üzərindən İsrailə silah göndərib-göndərmədiyi barədə isə ictimaiyyətə heç bir açıqlama verilmir.
