Monitorinqin nəticələri
Azərbaycanın İnsan Hüquqları üzrə Müvəkkili (Ombudsman) Aparatı Heydər Əliyev Beynəlxalq Aeroportunda tətbiq edilən yeni taksi xidmətləri ilə bağlı monitorinq aparıb. Sentyabrın 10-dan qüvvəyə minmiş tarif siyasəti nəticəsində yaranan vəziyyətin hüquqi baxımdan uyğunluğuna dair araşdırma aparılıb.
Monitorinqin nəticələrinə görə, yeni tariflər Konstitusiyanın 25-ci maddəsindəki bərabərlik hüququna və 59-cu maddədəki azad sahibkarlıq hüququna, həmçinin Rəqabət Məcəlləsinin müddəalarına uyğun gəlmir.
Süni qiymət artımı və məhdudiyyətlər
Aparatın açıqlamasında bildirilib ki, hazırda qüvvədə olan qaydalar:
-
Qiymətlərin süni şəkildə artırılmasına,
-
Sərnişinlərin seçim imkanlarının məhdudlaşdırılmasına,
-
Lisenziyalı taksi sürücülərinə bərabər imkanların yaradılmamasına,
-
Sürücülərin iqtisadi itkilərlə üzləşməsinə,
-
Vətəndaşlar arasında sosial narazılığın artmasına səbəb olur.
Ombudsman qeyd edib ki, monitorinq nəticələri ilə bağlı aidiyyəti dövlət qurumlarına rəsmi müraciət ediləcək.
Yeni tarif siyasəti
Sentyabrın 10-dan etibarən hava limanından sərnişindaşımalar yalnız müəyyən edilmiş qaydalara cavab verən taksilərlə həyata keçirilir.
Mövcud tariflərə görə:
-
Şəhərə səfərlər 5–6 manatdan başlayır;
-
3–25 km məsafə üçün hər kilometrə görə 0,80–0,95 manat,
-
26 km-dən çox məsafələrdə isə hər kilometr üçün 0,70 manat müəyyən olunub.
Bundan əlavə, hava limanında yeni taksi terminalı istifadəyə verilib. Buradan edilən sifarişlər üçün 20–30 manat arasında dəyişən xüsusi tariflər tətbiq olunur.
Dövlət qurumlarının mövqeyi
Yeni tariflərin əsas məqsədinin sərnişinlər üçün daha rahat və keyfiyyətli xidmət göstərmək olduğu açıqlansa da, qiymət siyasəti ciddi narazılıq yaradıb.
Antiinhisar və İstehlak Bazarına Nəzarət Dövlət Agentliyi artıq məsələnin araşdırıldığını bəyan edib. Lakin hələlik Heydər Əliyev Beynəlxalq Aeroportu, Azərbaycan Yerüstü Nəqliyyat Agentliyi (AYNA) və digər qurumlar rəsmi mövqe bildirməyiblər.
Yeni qaydalar həm sərnişinlərin, həm də taksi sürücülərinin hüquqlarına təsir göstərir. İndi diqqət bütünlüklə dövlət qurumlarının atacağı addımlara yönəlib.
