Rzayi: Hörmüzün təhlükəsizlik idarəçiliyində israrlıyıq
İran Ali Milli Təhlükəsizlik Şurasının katibi general-mayor Möhsün Rzayi Tehranda Pakistan ordusunun komandanı feldmarşal Asim Müniri qəbul edib.
Görüş zamanı İran-Pakistan münasibətləri ilə yanaşı, regiondakı təhlükəsizlik vəziyyəti və Hörmüz boğazı ətrafında gedən proseslər əsas müzakirə mövzularından olub.
Rzayi görüşdə Tehranın Hörmüz boğazının “İran tərəfindən təhlükəsizlik baxımından idarə olunması” mövqeyində israrlı olduğunu bir daha vurğulayıb.
“ABŞ-yə etibar etmirik”
İran rəsmisinin Vaşinqtonla bağlı açıqlaması da diqqət çəkib. Rzayi İranın ABŞ-yə etibar etmədiyini açıq şəkildə bildirib.
Onun sözlərinə görə, mövcud vəziyyətin dəyişməsi üçün Vaşinqton yalnız bəyanatlar verməklə kifayətlənməməli, siyasət və davranışını dəyişdirməli, İslamabad memorandumunda nəzərdə tutulan müddəaların həyata keçirilməsi üçün əməli addımlar atmalıdır.
Tehran bununla Hörmüz boğazı məsələsində mümkün irəliləyişi ABŞ-nin üzərinə götürdüyü öhdəlikləri yerinə yetirməsi ilə əlaqələndirir.
Pakistan ordusunun komandanı Tehranda
Asim Münir Pakistanın daxili işlər naziri Möhsün Rza Nəqvi ilə birlikdə İran paytaxtına səfər edib. Səfər çərçivəsində Pakistan nümayəndə heyətinin İranın yüksək vəzifəli rəsmiləri ilə görüşləri nəzərdə tutulub.
Danışıqların əsas məqsədlərindən biri iki ölkə arasında əməkdaşlığın gücləndirilməsi və regiondakı son proseslərin müzakirəsidir.
Asim Münir İslamabad memorandumundan danışdı
İran televiziyasının məlumatına görə, Asim Münir Pakistanın İslamabad memorandumunun imzalanması üçün ciddi səylər göstərdiyini bildirib.
Pakistan ordusunun komandanı eyni zamanda İranla Pakistan arasındakı qardaşlıq və dostluq münasibətlərinin əhəmiyyətini vurğulayıb.
Qalibaf da ABŞ-nin öhdəliklərini pozduğunu bildirdi
Asim Münir daha əvvəl İran İslam Şurası Məclisinin sədri Məhəmməd Baqir Qalibafla da görüşüb.
Qalibaf görüşdə memorandum çərçivəsində tərəflərin öhdəliklərinin aydın olduğunu və ABŞ-nin üzərinə götürdüyü öhdəlikləri yerinə yetirməli olduğunu bildirib.
İran parlamentinin sədrinin sözlərinə görə, Vaşinqtonun öhdəliklərini yerinə yetirməməsi regionda sabitliyin bərqərar olmasına mane olub və yeni etimadsızlıq yaradıb.
Hörmüz boğazı danışıqların mərkəzində
Diplomatik fəallıq İranla Oman arasında Hörmüz boğazında gəmiçilik qaydaları ilə bağlı danışıqların irəlilədiyi bir vaxta təsadüf edir.
Tehran daha əvvəl bildirib ki, Maskatla gəmiçilik qaydalarına dair mümkün razılaşmanın əldə edilməsi Hörmüz boğazının avtomatik açılması demək deyil.
İran tərəfi boğazın açılması məsələsini Vaşinqtonun İslamabad memorandumunda nəzərdə tutulan öhdəliklərini yerinə yetirməsi ilə əlaqələndirir.
Rzayinin son açıqlaması göstərir ki, Tehran həm Hörmüz boğazının təhlükəsizlik idarəçiliyi, həm də ABŞ ilə münasibətlər məsələsində əvvəlki mövqeyini qoruyur və Vaşinqtondan konkret addımlar tələb edir.
