Millimizin seçmə mərhələyə uğursuz startı
Azərbaycan milli komandası DÇ-2026-nın seçmə mərhələsində ilk oyununu keçirib. Fernandu Santuşun rəhbərlik etdiyi yığmamız D qrupunda səfərdə İslandiya ilə qarşılaşıb.
Reykyavikdə yerləşən “Lauqardalsvöllur” stadionunda baş tutan oyun millimiz üçün uğursuz nəticə ilə yadda qalıb. Qapımıza beş qol vuran İslandiya komandası oyunu tam nəzarətdə saxlayaraq inamlı qələbə qazanıb.
İlk hissədə son saniyə qolu
Matçın birinci yarısı meydan sahiblərinin üstünlüyü ilə keçsə də, Azərbaycan millisi müəyyən epizodlarda müdafiədə dirəniş göstərə bildi. Lakin əlavə olunan dəqiqələrdə Viktor Palsson hesabı açaraq İslandiyanı fasiləyə üstün yolladı – 1:0.
İkinci yarıda darmadağın
Fasilədən dərhal sonra meydan sahibləri hücumu gücləndirdi. Cəmi iki dəqiqə sonra İsak Yohannesson fərqi artırdı. Elə həmin futbolçu 56-cı dəqiqədə dubl edərək hesabı 3:0 etdi.
Oyunun gedişində Azərbaycan millisinin müdafiə xətti rəqibin sürətli hücumlarına tab gətirə bilmədi. 67-ci dəqiqədə Albert Qudmundsson, 73-cü dəqiqədə isə Daniel Leo Qretarsson fərqlənərək yekun nəticəni müəyyənləşdirdilər – 5:0.
Hakimlər briqadası və stadion
Görüşün baş hakimi Niderlanddan Sander van der Eyk olub. Ona həmyerliləri Rens Blümink və Stefan de Qroot kömək ediblər. VAR sisteminə Jerön Mansxot, AVAR funksiyasına isə Klay Ruperti təyinat alıb. Oyun Reykyavikdəki “Lauqardalsvöllur” stadionunda baş tutub.
Növbəti rəqib Ukrayna
Azərbaycan millisi seçmə mərhələdə növbəti oyununu sentyabrın 9-da keçirəcək. Yığmamız Bakıda Ukrayna millisini qəbul edəcək.
