Fransa millisində yeni dövr başlayır
Fransa millisinin baş məşqçisi Didye Deşam 2026 FIFA Dünya Kubokunda İngiltərəyə 4:6 hesabı ilə məğlub olduqları üçüncülük oyunundan sonra vəzifəsindən ayrılıb.
57 yaşlı mütəxəssis daha əvvəl turnirdən sonra postunu tərk edəcəyini açıqlamışdı. Mayamidə keçirilən qarşılaşma onun Fransa millisinin sükanı arxasında son oyunu olub.
Oyundan sonra Fransa Futbol Federasiyası rəsmi sosial media hesablarında Deşama təşəkkür edərək, onun Fransa futbolunun tarixində silinməz iz qoyduğunu vurğulayıb.
Həm futbolçu, həm də baş məşqçi kimi dünya çempionu olub
Didye Deşam Fransa futbolunun ən uğurlu simalarından biri hesab olunur.
O, 1998-ci ildə doğma ölkəsində keçirilən Dünya Kubokunda kapitan kimi çempionluq sevinci yaşayıb. Daha sonra 2018-ci ildə Rusiyada təşkil olunan mundialda Fransa yığmasını baş məşqçi kimi dünya çempionu edib.
Bununla da Deşam həm futbolçu, həm də baş məşqçi kimi Dünya Kubokunu qazanan azsaylı futbol adamlarından biri kimi tarixə düşüb.
Fransa ilə bir sıra uğurlara imza atıb
Didye Deşamın rəhbərliyi altında Fransa millisi 2021-ci ildə UEFA Millətlər Liqasının qalibi olub.
Komanda həmçinin 2014-cü il Dünya Kubokunda dörddəbir finala, AVRO-2016 və 2022-ci il Dünya Kubokunda finala, AVRO-2024-də yarımfinala yüksəlib.
Dünya Kubokunda rekord göstəricilər
İngiltərə ilə keçirilən qarşılaşma Deşam üçün Dünya Kubokları tarixində 27-ci oyun olub. Bu göstərici onu mundial tarixində ən çox oyun keçirən baş məşqçi edib.
O, eyni zamanda Dünya Kuboklarında qazandığı 20 qələbə ilə turnir tarixinin ən çox qalib gələn baş məşqçisi rekorduna da sahibdir.
2012-ci ildən Fransa millisini çalışdıran Deşam bu müddətdə komandanı ümumilikdə 187 rəsmi oyuna çıxarıb. Onun rəhbərliyi altında Fransa 122 qələbə qazanıb, 32 heç-heçə edib və 33 dəfə məğlub olub.
