Haaretz qəzetinin məlumatına görə, İsrail baş naziri Benyamin Netanyahu bir neçə görüşdə hərbi rəsmilərə onların “şişirdilmiş narahatlıqlar” ifadə etdiyini bildirib.
Məlumatda qeyd olunur ki, İsrail ordusunun Baş Qərargah rəisi Eyəl Zamir nazirlərə əlavə hərbi təzyiqin əsgərlər arasında daha çox itkiyə, əsir israillilərin ölüm sayının artmasına və ehtiyat qüvvələrin daha da gərginləşməsinə səbəb olacağını deyib.
Haaretz əlavə edib ki, Rəfahın işğalı israilli əsirlərin və əsgərlərin ölümünə gətirib çıxarıb, lakin onların azad olunmasına səbəb olmayıb. Qəzet yazır ki, hərbi komandanlar Netanyahunun görüşlərdə mütəxəssis məsləhətlərini ardıcıl şəkildə qulaqardına vurmasından narahatdırlar.
Qəzzaya hücumların davam etdiyi və müharibənin ikinci ilə yaxınlaşdığı bir vaxtda, işğalçı ordunun sıralarında narazılıqların və dağılmanın artdığı bildirilir.
Bundan əvvəl Ordu Radiosu xəbər vermişdi ki, Zamirlə siyasi rəhbərlik arasındakı gərginlik “zirvəyə çatıb” və siyasətçilər ordudan Qəzzada müharibəni davam etdirmək üçün aydın plan təqdim etməsini tələb edirlər.
