Moskva Buşəhr AES-lə bağlı xəbərdarlıq etdi
Rusiyanın Vyanadakı beynəlxalq təşkilatlar yanında daimi nümayəndəsi Mixail Ulyanov bildirib ki, İranın Buşəhr Atom Elektrik Stansiyasına ediləcək istənilən hücum Körfəz ölkələri üçün fəlakətli nəticələrə səbəb ola bilər.
O, “X” platformasında paylaşdığı açıqlamada nüvə obyektlərinə hücumun beynəlxalq hüququn kobud şəkildə pozulması olduğunu vurğulayaraq bu cür əməliyyatların dərhal dayandırılmasına çağırıb.
“Rosatom”: Buşəhr vilayəti bombalanıb
Rusiyanın dövlət nüvə şirkəti “Rosatom”un baş direktoru Aleksey Lixaçov Buşəhr vilayətinin hava hücumuna məruz qaldığını, lakin atom elektrik stansiyasının zərər görmədiyini açıqlayıb.
Bəyanat ABŞ ordusunun İrana qarşı həyata keçirdiyi son hücumlardan sonra səsləndirilib.
ABŞ və İran arasında qarşılıqlı iddialar
ABŞ Mərkəzi Komandanlığı İran ərazisində təxminən 90 hədəfə zərbələr endirdiyini açıqlayıb. Vaşinqton əməliyyatların Hörmüz boğazında ticarət gəmilərinə qarşı həyata keçirilən hücumlara cavab olaraq icra edildiyini iddia edib.
İran İnqilab Keşikçiləri Korpusu isə cavab olaraq Küveytdə iki, Bəhreyndə isə iki ABŞ hərbi bazasını hədəfə aldığını bəyan edib.
Buşəhr AES region üçün strateji əhəmiyyət daşıyır
Buşəhr Atom Elektrik Stansiyası İranın elektrik enerjisi istehsal edən ilk nüvə stansiyasıdır və Fars körfəzi sahilində yerləşir.
Stansiya Rusiya ilə əməkdaşlıq çərçivəsində fəaliyyət göstərir və Beynəlxalq Atom Enerjisi Agentliyinin nəzarəti altındadır.
Mütəxəssislər bildirirlər ki, stansiyanın hədəfə alınması radioaktiv sızma riski yarada və bunun nəticələri Körfəz ölkələrinin böyük hissəsinə yayıla bilər.
Hazırda Rusiyanın dövlət nüvə şirkəti “Rosatom” Buşəhr AES-də iki yeni enerji blokunun tikintisini həyata keçirir. Şirkət ABŞ-İsrail hərbi əməliyyatlarının başlanmasından sonra yüzlərlə əməkdaşını tikinti sahəsindən təxliyə edib.
