Kemp-Deviddə gərgin müzakirə
ABŞ-ın “Vaşinqton Post” qəzetinin məlumatına görə, Prezident Donald Tramp ötən həftə Kemp-Deviddə keçirilən hökumət iclası zamanı müdafiə naziri Pit Heqsetlə kəskin mübahisə edib.
Qəzetin mövzu ilə tanış iki mənbəyə istinadən yaydığı xəbərdə bildirilir ki, Tramp ABŞ ordusunun sursat ehtiyatlarında yaranmış ciddi çatışmazlıqla bağlı Heqsetdən izahat tələb edib və vəziyyət barədə ona düzgün məlumat verilmədiyini bildirib.
İran amili qərarlara təsir edib
Mənbələrin sözlərinə görə, xüsusilə uzaqmənzilli dəqiq idarəolunan raketlər və hava hücumundan müdafiə sistemləri üçün nəzərdə tutulan raketlərin azalması ABŞ-ın hərbi imkanlarını məhdudlaşdırır.
Qəzet iddia edir ki, bu amil Trampın son günlər İrana qarşı daha genişmiqyaslı hərbi əməliyyatlardan imtina etməsinin əsas səbəblərindən biri olub.
Heqset məsuliyyəti müavinin üzərinə atıb
“Vaşinqton Post” yazır ki, Pit Heqset iclas zamanı özünü müdafiə edərək yaranmış vəziyyətə görə müavini Stiven Faynberqi məsul tutub.
Nazirin fikrincə, Faynberq sursat ehtiyatlarının real vəziyyəti barədə prezidenti tam məlumatlandırmayıb.
ABŞ-ın raket ehtiyatları azalır
Məqalədə qeyd olunur ki, ABŞ administrasiyası “Patriot” hava hücumundan müdafiə raketləri də daxil olmaqla bəzi silah növlərinin istehsalını artırmaq üçün yeni müqavilələr imzalayıb. Lakin bu sursatların istehsalının iki ilə qədər vaxt aparacağı bildirilir.
Bunun isə mövcud çatışmazlığı qısa müddətdə aradan qaldırmayacağı vurğulanır.
Digər ABŞ mediası da oxşar məlumat yayıb
CNN televiziya kanalının məlumatına görə, ABŞ ordusu hava hücumundan müdafiə üçün istifadə olunan raket ehtiyatlarının təxminən 80 faizini sərf edib.
CBS News isə iki mənbəyə istinadən bildirib ki, İranla qarşıdurma zamanı ABŞ uzaqmənzilli dəqiq idarəolunan raket ehtiyatlarının demək olar ki, hamısından istifadə edib.
Bundan əlavə, Reuters agentliyi də mənbələrə istinadən ABŞ-ın xüsusilə ATACMS və PrSM tipli raket ehtiyatlarında ciddi azalma yarandığını bildirib.
