Partlayış Məcdəl Zunda baş verib
İşğalçı İsrail KİV-lərinin yaydığı məlumata görə, hadisə Livanın cənubundakı Məcdəl Zun qəsəbəsində qeydə alınıb. Bildirilir ki, partlayıcı qurğunun yerləşdirildiyi binada baş verən partlayış nəticəsində işğalçı İsrail ordusunun 55-ci briqadasının hərbçiləri arasında itkilər olub.
İlkin məlumata əsasən, partlayış nəticəsində azı iki hərbçi həyatını itirib, yeddi nəfər isə müxtəlif dərəcəli xəsarətlər alıb.
Bir hərbçinin vəziyyəti ağırdır
İşğalçı İsrail mediası əlavə edib ki, ağır yaralanan daha bir hərbçinin həyatı üçün təhlükə qalır. Onun təcili cərrahi əməliyyata alındığı və həkimlərin həyatını xilas etmək üçün mübarizə apardığı bildirilir.
Yaralılar xəstəxanaya çatdırılıb
Məlumatlarda qeyd olunur ki, hadisədən sonra yaralıların təxliyəsi üçün helikopter cəlb edilib. Helikopter işğal altında olan Hayfadakı “Rambam” Tibb Mərkəzinə enib və onu üç təcili tibbi yardım avtomobili qarşılayıb.
Gərginlik davam edir
Hadisə İşğalçı İsrailin Livana qarşı davam edən hərbi əməliyyatları fonunda baş verib. Son aylarda bölgədə yaşayış məntəqələrinin dağıdılması, artilleriya atəşləri, pilotsuz uçuş aparatları ilə zərbələr və digər hərbi əməliyyatlar davam edir.
Hadisə ilə bağlı işğalçı İsrail ordusu tərəfindən hələlik rəsmi açıqlama verilməyib.
