AXCP fəalının həbs olunduğu bildirilib
Azərbaycan Xalq Cəbhəsi Partiyasının (AXCP) Tovuz rayon şöbəsinin fəalı Elmar Piriyev iyulun 31-də inzibati qaydada 10 sutka müddətinə həbs olunub.
Partiya həbsin səbəbini açıqlayıb
AXCP-nin məlumatına görə, Elmar Piriyevin həbsinə səbəb onun sosial şəbəkələrdə etdiyi tənqidi paylaşımlar olub.
Partiyadan bildirilib ki, iyulun 27-dən etibarən fəalla əlaqə saxlamaq mümkün olmayıb. Sonradan onun inzibati qaydada həbs edildiyi məlum olub.
AXCP: 20-dən çox üzv və fəal həbsdədir
AXCP-nin açıqlamasında qeyd olunur ki, hazırda partiyanın sədri Əli Kərimli də daxil olmaqla 20-dən çox partiya üzvü və fəalı müxtəlif ittihamlarla həbsdə saxlanılır.
Partiya onların siyasi motivlərlə təqib olunduğunu iddia edir.
Rəsmi mövqe
Azərbaycanın Siyasi Məhbuslarının Azadlığı Uğrunda İttifaqın son açıqladığı siyahıda 328 nəfərin siyasi məhbus kimi göstərildiyi bildirilir.
Azərbaycan hakimiyyəti isə ölkədə siyasi motivli həbslərin olması barədə iddiaları qəbul etmir. Rəsmi qurumlar bildirirlər ki, həbs edilən şəxslər siyasi baxışlarına görə deyil, qanunvericilikdə nəzərdə tutulan konkret hüquqpozmalara görə məsuliyyətə cəlb olunublar.
