Tehran ABŞ-ni Təhdit Etdi
İranın “Xatəmül-Ənbiya” Mərkəzi Qərargahı bazar ertəsi yaydığı bəyanatda ABŞ-nin bölgədə təhlükəsizliyi pozmağa yönəlmiş fəaliyyətini davam etdirdiyini bildirib.
Açıqlamada qeyd olunub ki, Vaşinqton İrana qarşı qanunsuz dəniz blokadası tətbiq etməyə çalışır.
İran gəmilərinə təhdid
Qərargahın bəyanatına görə, ABŞ İranın sahil və ərazi sularında üzən İran bayraqlı gəmiləri, ticarət gəmilərini və neft tankerlərini hədələyib.
Tehran bu addımları bölgədə gərginliyi daha da artıran təhlükəli fəaliyyət kimi qiymətləndirib.
“Dəniz blokadası müharibənin genişlənməsi deməkdir”
“Xatəmül-Ənbiya” Mərkəzi Qərargahı vurğulayıb ki, ABŞ-nin İrana qarşı dəniz blokadası tətbiq etmək cəhdi müharibənin coğrafiyasının genişləndirilməsi kimi qəbul ediləcək.
Bəyanatda qeyd olunub ki, İran Silahlı Qüvvələri ABŞ ordusundan gələn istənilən təhdidə qarşı qətiyyətlə cavab verməyə hazırdır.
Xarici İşlər Nazirliyi də mövqeyini açıqlayıb
İran Xarici İşlər Nazirliyinin sözçüsü və danışıqlar heyətinin üzvü İsmayıl Bəqayi də bildirib ki, ölkəsi üçün əsas meyar milli maraqlardır və Tehran müharibə və sülhlə bağlı qərarların Vaşinqton tərəfindən diktə edilməsinə imkan verməyəcək.
O, həmçinin ABŞ-ni imzalanmış anlaşmanı pozmaqda ittiham edərək, İranın da buna cavab olaraq öz öhdəliklərini dayandırdığını bildirib.
Bəqayi əlavə edib ki, İrana qarşı hücumlara görə əsas məsuliyyət ABŞ-nin üzərinə düşür və bəzi regional ölkələrin bu prosesdə iştirakına da göz yumulmayacağını vurğulayıb.
Gərginlik davam edir
İranın bu açıqlamaları ABŞ ilə hərbi qarşıdurmanın yenidən intensivləşdiyi, Tehranın isə Körfəz bölgəsi, Suriya və İordaniyada yerləşən ABŞ hərbi bazalarına qarşı əməliyyatlar keçirdiyini bəyan etdiyi bir vaxta təsadüf edir.
