“Blokada aradan qaldırılmadan danışıqlar mənasızdır”
Ənsarullah hərəkatının Siyasi Bürosunun üzvü Deyfullah əş-Şami bildirib ki, Yəmənə qarşı tətbiq olunan blokada davam etdiyi müddətdə heç bir danışığın əhəmiyyəti olmayacaq.
Onun sözlərinə görə, Səudiyyə Ərəbistanının Səna hava limanına qarşı həyata keçirdiyi əməliyyatlardan əvvəlki vəziyyətə qayıdışı təmin edə biləcək heç bir siyasi razılaşma mövcud deyil.
“Hüquqlarımızı sülhlə də, müharibə ilə də əldə edəcəyik”
Əş-Şami qeyd edib ki, Yəmən xalqı öz hüquqlarını istər sülh, istərsə də müharibə yolu ilə əldə etmək əzmindədir.
O bildirib ki, ölkənin blokadasını yarmaq məqsədilə başladılan proses çərçivəsində qarşıdurmanı daha geniş miqyasda davam etdirməyə hazırdırlar.
Səudiyyəyə sərt mesaj
Ənsarullah rəsmisi Səudiyyə Ərəbistanını Yəmən üzərində nəzarət yaratmağa çalışmaqda ittiham edərək, Riyadı ölkənin daxili işlərinə müdaxiləni dayandırmağa çağırıb.
Onun sözlərinə görə, Yəmən xalqı yalnız xarici müdaxilələr başa çatdıqdan sonra ləyaqətli həyat qura bilər.
İordaniyanın təşəbbüsünü alqışladı
Əş-Şami İordaniyanın Yəmənə aviareyslərin bərpası ilə bağlı təşəbbüsünü müsbət qiymətləndirib və bu istiqamətdə atılan bütün addımları dəstəklədiklərini bildirib.
Bununla yanaşı, o, Qətərin mövqeyini tənqid edərək, bu ölkənin Yəmənin addımlarını daha yaxşı başa düşməli olduğunu söyləyib.
“Bütün variantlar açıqdır”
Ənsarullah nümayəndəsi vurğulayıb ki, ilk addımlar xəbərdarlıq xarakteri daşıyıb və Yəmən Silahlı Qüvvələri ölkənin hüquqlarını qorumaq üçün kifayət qədər hərbi imkanlara malikdir.
O əlavə edib ki, Yəmən müqavimət oxunun ayrılmaz hissəsidir və bu blokun digər tərəfləri ilə koordinasiyanı davam etdirir.
Əş-Şaminin açıqlamaları Yəmənin 2016-cı ildən tətbiq olunan blokadanın aradan qaldırılmasını tələb etdiyi və bu məqsədlə Səudiyyə Ərəbistanına qarşı dəniz blokadası tətbiq etdiyini açıqladığı bir vaxta təsadüf edir.
