Putin əvvəl Paşinyan, sonra Əliyevlə danışıb
Rusiya Prezidenti Vladimir Putin iki gün ərzində əvvəl Ermənistanın Baş naziri Nikol Paşinyan, daha sonra isə Azərbaycan Prezidenti İlham Əliyevlə telefon əlaqəsi saxlayıb.
İyulun 27-də baş tutan Putin–Paşinyan danışığında Ermənistan-Rusiya münasibətləri, iqtisadi əməkdaşlıq və ikitərəfli gündəmdəki məsələlər müzakirə olunub.
Ermənistan hökumətinin məlumatına görə, Paşinyan Ermənistan məhsullarının Rusiya bazarına çıxışına tətbiq edilən məhdudiyyətlərin iki ölkə arasındakı hüquqi öhdəliklərə və Avrasiya İqtisadi İttifaqının qaydalarına uyğun olmadığını bildirib. O, yaranmış problemlərin aradan qaldırılması üçün konkret addımların atılmasının vacibliyini vurğulayıb.
Avropa İttifaqına üzvlük məsələsi də gündəmə gəlib
Telefon danışığında Ermənistanın Avropa İttifaqına mümkün üzvlüyü də müzakirə olunub.
Paşinyan qeyd edib ki, ölkəsinin Avropa İttifaqına üzvlüyü ilə bağlı referendum yalnız rəsmi üzvlük müraciəti təqdim edildikdən sonra keçirilə bilər. O, İrəvanın bütün mübahisəli məsələləri dialoq və tərəfdaşlıq yolu ilə həll etməyə hazır olduğunu bildirib.
Əliyevlə regional və ikitərəfli məsələlər müzakirə edilib
İyulun 28-də isə Vladimir Putin Azərbaycan Prezidenti İlham Əliyevlə telefon danışığı aparıb.
Rəsmi məlumata əsasən, tərəflər Azərbaycan-Rusiya münasibətlərinin hazırkı vəziyyətini, beynəlxalq və regional gündəmdə yer alan məsələləri müzakirə ediblər. Hər iki lider dialoqun davam etdirilməsində və əməkdaşlığın daha da genişləndirilməsində maraqlı olduqlarını ifadə ediblər.
Zaxarovanın Qarabağ açıqlaması müzakirələrə səbəb olub
Həmin gün Rusiya Xarici İşlər Nazirliyinin sözçüsü Mariya Zaxarova “Qvardeysk” Gənclər Forumunda çıxışı zamanı Qarabağ və Kollektiv Təhlükəsizlik Müqaviləsi Təşkilatı ilə bağlı fikirlər səsləndirib.
Zaxarovanın sözlərinə görə, Ermənistan vaxtilə KTMT-nin mexanizmlərinin işə salınmasını istəsə də, Qarabağı nə öz ərazisi, nə də müstəqil dövlət kimi tanımadığı üçün təşkilatın münaqişəyə müdaxiləsi mümkün olmayıb.
Azərbaycan XİN-dən cavab
Azərbaycan Xarici İşlər Nazirliyinin sözçüsü Ayxan Hacızadə Zaxarovanın açıqlamalarına münasibət bildirərək onların reallığı əks etdirmədiyini bəyan edib.
Onun sözlərinə görə, Qarabağ beynəlxalq ictimaiyyət, o cümlədən Rusiya tərəfindən hər zaman Azərbaycanın ayrılmaz tərkib hissəsi kimi tanınıb. Bu səbəbdən KTMT məsələsinin Ermənistanın Qarabağı tanıyıb-tanımaması ilə əlaqələndirilməsi Rusiyanın rəsmi mövqeyi ilə ziddiyyət təşkil edir.
Hacızadə əlavə edib ki, Azərbaycan öz ərazi bütövlüyünü və suverenliyini beynəlxalq hüquq çərçivəsində bərpa edib və keçmiş Ermənistan-Azərbaycan münaqişəsi artıq başa çatıb. O, həmçinin Rusiya-Ermənistan münasibətlərinə aid məsələlərin Azərbaycanla əlaqələndirilməsi praktikasına son qoyulmasının vacibliyini vurğulayıb.
