Trampın təşəbbüsü kəşfiyyat qurumlarında fikir ayrılığı yaradıb
ABŞ Prezidenti Donald Trampın ölkənin bütün casusları və potensial agentlərini əhatə edən vahid məlumat bazasının yaradılması ilə bağlı təşəbbüsü Mərkəzi Kəşfiyyat İdarəsi (CIA) və Federal Təhqiqat Bürosu (FBI) rəhbərliyinin ciddi etirazına səbəb olub.
The New York Times qəzetinin yaydığı məlumata görə, ABŞ Milli Kəşfiyyat Direktoru Ofisi (ODNI) keçmiş direktor Tulsi Qabbardın və onun ardınca vəzifəyə gətirilən Bill Pultenin rəhbərliyi dövründə bütün kəşfiyyat qurumlarının məxfi əməliyyatlarını əhatə edən vahid “ana siyahı”nın hazırlanması istiqamətində iş aparır.
Məqsəd koordinasiyanı artırmaqdır
Məlumata əsasən, Ağ Ev bu siyahının yaradılmasını xarici kəşfiyyat təhdidlərinin daha effektiv izlənilməsi və müxtəlif qurumların eyni hədəflər üzərində paralel fəaliyyət göstərməsi zamanı yarana biləcək problemlərin qarşısının alınması ilə əsaslandırır.
ABŞ Milli Kəşfiyyat Direktoru Ofisi 11 sentyabr terror aktlarından sonra ölkənin kəşfiyyat strukturları arasında koordinasiyanı gücləndirmək məqsədilə yaradılıb.
CIA və FBI təhlükəsizlik risklərindən narahatdır
Yüksək vəzifəli əks-kəşfiyyat rəsmiləri isə belə bir vahid məlumat bazasının qorunmasının son dərəcə çətin olacağını bildirirlər. Onların fikrincə, siyahının sızması illərlə davam edən gizli əməliyyatları və məxfi araşdırmaları təhlükə altına qoya bilər.
FBI üçün belə bir siyahı casusluqda şübhəli bilinən və istintaqa cəlb edilən şəxslər barədə məlumatları da əhatə edəcək. Keçmiş və hazırkı kəşfiyyat əməkdaşları hesab edirlər ki, bu cür həssas məlumatların bir mərkəzdə toplanması tək bir məlumat sızması nəticəsində çoxsaylı əməliyyatların ifşa olunmasına səbəb ola bilər.
Qurumlar arasında gərginlik dərinləşir
Nəşrin məlumatına görə, sözügedən məsələ Milli Kəşfiyyat Direktoru Ofisi ilə CIA və FBI arasında mövcud olan fikir ayrılıqlarını daha da gücləndirib.
Bildirilir ki, Bill Pultenin Senatın təsdiq prosedurundan keçmədən müvəqqəti direktor təyin olunması da bəzi kəşfiyyat rəsmilərində narahatlıq yaradıb. Onlar hesab edirlər ki, belə həssas məlumatların idarə olunması üçün daha yüksək təcrübə və institusional nəzarət tələb olunur.
Hazırda tərəflər Milli Kəşfiyyat Direktoru Ofisinə hansı həcmdə məlumat təqdim ediləcəyi ilə bağlı qapalı müzakirələri davam etdirirlər.
