Barak: “İsrail Livanda tam uğursuzluğa uğrayıb”
Keçmiş İsrail baş naziri Ehud Barak “Haaretz” qəzetində yayımlanan məqaləsində Benyamin Netanyahu hökumətini sərt tənqid edib.
Barak bildirib ki, Livandakı vəziyyəti bir sözlə ifadə etmək mümkündür: “uğursuzluq”.
Onun sözlərinə görə, İsrail ordusu hazırda “əlləri bağlı şəkildə” döyüşür və Livanın cənubunda yaradılmağa çalışılan təhlükəsizlik zolağı belə Hizbullahın hücumlarını dayandıra bilmir.
“Hizbullah hələ də güclüdür”
Ehud Barak qeyd edib ki, İsrailin son illərdə əldə etdiyini iddia etdiyi bütün uğurlar faktiki olaraq nəticəsiz qalıb.
O, peycer əməliyyatlarını, rəhbər şəxslərin öldürülməsini, “Rədvan” qüvvələrinə və raket sistemlərinə endirilən zərbələri xatırladaraq bildirib ki, bütün bunlar Hizbullahı çökdürməyib.
Barakın sözlərinə görə, Şeyx Nəim Qasim rəhbərliyində Hizbullah:
- İsrail ordusuna zərbələr endirməyə davam edir;
- şimal bölgəsində həyatı iflic vəziyyətinə salır;
- silahı təhvil verməyə dair heç bir əlamət göstərmir.
“Hərbi həllə inanmaq təhlükəli illüziyadır”
Keçmiş baş nazir vurğulayıb ki, Hizbullahı tam məhv etmək üçün bütün Livanın işğalı tələb olunur və bu isə real deyil.
O bildirib ki, yalnız hərbi yola arxalanmaq “təhlükəli və ağılsız yanaşmadır”.
Barak hesab edir ki, Hizbullah məsələsinin həlli yalnız siyasi yol, Livan hökuməti, ABŞ və regional tərəflərlə koordinasiya vasitəsilə mümkündür.
“Netanyahu Hizbullaha xidmət edir”
Ehud Barak kənd və yaşayış məntəqələrinin dağıdılmasının əks nəticə verdiyini də qeyd edib.
Onun sözlərinə görə, bu siyasət Hizbullahın “Livanı qoruyan yeganə qüvvə” olduğu iddiasını gücləndirir.
Barak bildirib:
“Biz Hizbullaha zərbə vurmaq əvəzinə, ona kömək etmiş oluruq.”
“İrəliləyiş yalnız Netanyahu gedəndən sonra mümkündür”
Məqaləsində Netanyahuya qarşı ən sərt ittihamlardan birini də səsləndirən Barak deyib ki, baş nazir şəxsi və siyasi maraqları naminə həm Qəzza, həm Livan, həm də Suriya istiqamətində siyasi həll imkanlarını dəfələrlə məhv edib.
O əlavə edib ki, İsrailin şimal bölgəsinin sakinləri hökumətin vədlərinə artıq inanmır.
Ehud Barak məqaləsini belə yekunlaşdırıb:
“Netanyahu hakimiyyətdən getməyənə qədər heç bir real irəliləyiş mümkün deyil.”
