İran dəniz əməliyyatı keçirdiyini elan etdi
İran İnqilab Keşikçiləri Korpusu dəniz qüvvələrinin ABŞ və İsraillə əlaqəli olduğu deyilən “MSC Sariska” gəmisini hədəfə aldığını açıqlayıb.
Məlumata görə, hücum qanadlı raket vasitəsilə həyata keçirilib.
Tehran bunu “cavab əməliyyatı” adlandırdı
İran tərəfi bildirib ki, əməliyyat ABŞ ordusunun Oman dənizində İranın “Liyan Star” gəmisinə qarşı həyata keçirdiyi hücuma cavab olaraq təşkil edilib.
İnqilab Keşikçiləri ABŞ qüvvələrinin bölgədəki hər hansı addımına sərt cavab veriləcəyini vurğulayıb.
“Hər hücuma qəti cavab veriləcək”
İranın dəniz qüvvələri bölgədə mümkün eskalasiyaya tam hazır olduqlarını açıqlayıb.
Bəyanatda qeyd olunub ki, ABŞ qüvvələrinin bölgədəki fəaliyyəti diqqətlə izlənilir.
Hörmüz boğazı ilə bağlı yeni xəbərdarlıq
Bundan əvvəl İranın “Xatəmül-Ənbiya” Mərkəzi Qərargahı Hörmüz boğazından keçən bütün ticarət və neft gəmilərinin yalnız müəyyən edilmiş marşrutlardan istifadə etməli olduğunu bildirmişdi.
Tehran qeyd edib ki, bütün gəmilər İran İnqilab Keşikçilərinin dəniz qüvvələrindən xüsusi icazə almalıdır.
İran təhlükəsizlik qaydalarını sərtləşdirib
İran rəsmiləri xəbərdarlıq edib ki, müəyyən edilən qaydalara əməl etməyən gəmilərin təhlükəsizliyi risk altına düşə bilər.
Hörmüzdə “dəniz nəzarət zonası” yaradılıb
Tehran mayın 21-də Hörmüz boğazında “dəniz nəzarət zonası” yaratdığını elan etmişdi.
İran həmin zonanın sərhədlərini İranın Qəşm adası və BƏƏ sahilləri arasında müəyyənləşdirib.
Bölgədə gərginlik artır
Son həftələr İran, ABŞ və İsrail arasında qarşılıqlı ittihamlar və hərbi gərginlik daha da yüksəlib.
Xüsusilə Hörmüz boğazı və Oman dənizi ətrafında baş verən hadisələr beynəlxalq enerji və ticarət təhlükəsizliyi ilə bağlı narahatlığı artırır.
