Ağ Ev ilk uçuşun tarixini açıqladı
Ağ Ev bəyan edib ki, ABŞ Prezidenti Donald Tramp çərşənbə günü ilk dəfə Qətərin ABŞ Müdafiə Nazirliyinə təqdim etdiyi “Air Force One” təyyarəsi ilə rəsmi uçuş həyata keçirəcək.
Məlumata görə, Tramp təyyarə ilə ABŞ-ın müstəqilliyinin 250 illiyi münasibətilə keçiriləcək tədbirdə iştirak etmək üçün Şimali Dakota ştatına yollanacaq.
Təyyarə mübahisələrə səbəb olub
ABŞ Konstitusiyasına əsasən, prezident və digər yüksək vəzifəli şəxslər Konqresin razılığı olmadan hər hansı xarici dövlət, monarx və ya hökmdardan hədiyyə, imtiyaz və ya titul qəbul edə bilməzlər.
Tramp administrasiyası təyyarənin birbaşa ABŞ Müdafiə Nazirliyinə təqdim edildiyini bildirsə də, Pentaqon daha sonra onun Trampın prezident kitabxanasına veriləcəyini açıqlayıb. Bu isə hədiyyənin hüquqi, etik və təhlükəsizlik baxımından ciddi müzakirələrə səbəb olub.
Qətərin hədiyyəsi müvəqqəti istifadə olunacaq
Ağ Ev rəsmisinin sözlərinə görə, sözügedən təyyarə ABŞ-ın yeni prezident təyyarələri istifadəyə verilənədək müvəqqəti xidmət göstərəcək.
Daha əvvəl Donald Tramp Qətərin ona təqdim etdiyi, əvvəllər Əmir Şeyx Təmim bin Həməd Al Taninin istifadə etdiyi xüsusi təchizatlı “Boeing 747” təyyarəsini yüksək qiymətləndirərək bunu Qətərin xoş niyyətinin göstəricisi adlandırmışdı.
Yeni prezident təyyarələrinin təhvilində gecikmə var
Qətərin təqdim etdiyi təyyarə ABŞ-ın sifariş verdiyi iki yeni “Boeing 747-8” prezident təyyarəsi təhvil verilənədək istifadə olunacaq.
Qeyd edək ki, bu proqram son illərdə həm istehsal gecikmələri, həm də xərclərin artması səbəbindən dəfələrlə gündəmə gəlib.
