Tehranda izdihamlı dəfn mərasimi
İran dövlət televiziyasının məlumatına görə, bazar ertəsi Tehranda şəhid Ayətullah Seyid Əli Xameneinin və ailəsinin üç üzvünün cənazəsinin dəfn mərasimində iştirak etmək üçün yüz minlərlə, hətta milyonlarla insan paytaxt küçələrinə toplaşıb.
Şəhidlərin tabutlarını daşıyan kortej səhər saatlarında hərəkətə başlayıb. Mərasimdə Xameneinin azyaşlı nəvəsinin cənazəsinin də olduğu bildirilib.
Etiraz şüarları səsləndirildi
Mərasim iştirakçıları ABŞ və İsrail əleyhinə şüarlar səsləndirib, “qatillərdən qisas” çağırışları ediblər.
İran mediası insanların səhər tezdən mərasim məkanına axın etdiyini, bunun ölkənin müasir tarixində ən böyük dəfn mərasimlərindən biri olmasının gözlənildiyini bildirib.
Dəfn mərasimləri altı gün davam edəcək
İran rəsmilərinin açıqlamasına əsasən, şəhid Ayətullah Seyid Əli Xameneinin dəfn mərasimləri ümumilikdə altı gün davam edəcək.
Rəsmi plana görə, cənazə Tehrandan sonra Qum şəhərinə, daha sonra İraqın Nəcəf və Kərbəla şəhərlərinə aparılacaq. Dəfn mərasiminin son mərhələsi iyulun 9-da Məşhəd şəhərində yerləşən İmam Rza (ə) ziyarətgahında keçiriləcək.
Milyonlarla iştirakçı gözlənilir
İran tərəfinin qiymətləndirməsinə görə, bütün mərasimlər ərzində 15–20 milyon insanın iştirak edəcəyi gözlənilir. Bu göstəricinin ölkə tarixinin ən böyük rəsmi dəfn mərasimi kimi qiymətləndirildiyi bildirilir.
