Əhalinin əksəriyyəti Bundesverə etibar etmir
“YouGov” şirkətinin iyunun 17-dən iyulun 1-dək Almaniyada 2 min 79 nəfərin iştirakı ilə keçirdiyi sorğuya əsasən, respondentlərin 70 faizi Almaniya ordusunun (Bundesver) ölkəni mümkün hərbi hücumdan qoruya biləcəyinə inanmadığını bildirib.
Sorğuda iştirak edənlərin cəmi 21 faizi orduya etibar etdiyini deyib, 8 faiz isə suala cavab verməyib.
Araşdırmanın əhatə etdiyi ölkələr arasında orduya inam səviyyəsinin ən aşağı olduğu ölkənin Almaniya olduğu qeyd edilib.
Müdafiə xərcləri ilə bağlı fikir ayrılığı var
Sorğunun nəticələrinə görə, respondentlərin 40 faizi Almaniyanın müdafiə büdcəsini kifayət qədər hesab etmir.
Bununla yanaşı, iştirakçıların 77 faizi müdafiə xərclərinin artırılması üçün vergilərin yüksəldilməsinə qarşı çıxıb.
Respondentlərin 62 faizi müdafiə büdcəsini artırmaq məqsədilə dövlət xidmətlərinin maliyyələşdirilməsinin azaldılmasını istəmədiyini, 59 faizi isə hökumətin əlavə borclanmasına qarşı olduğunu bildirib.
Berlin ordunu gücləndirməyi planlaşdırır
Rusiya-Ukrayna müharibəsinin 2022-ci ildə başlamasından sonra Almaniya hökuməti ölkənin müdafiə qabiliyyətinin artırılması istiqamətində geniş proqram həyata keçirməyə başlayıb.
Rəsmi planlara əsasən, müdafiə xərclərinin ötən ilki 86 milyard avrodan 2029-cu ildə 153 milyard avroya çatdırılması nəzərdə tutulur.
Hökumət həmçinin 2035-ci ilədək peşəkar hərbçilərin sayını 184 mindən 260 minə, ehtiyat qüvvələrinin sayını isə 200 min nəfərə çatdırmağı hədəfləyir.
Məcburi hərbi xidmət yenidən müzakirə olunur
Mütəxəssislər bu hədəflərə nail olmağın asan olmayacağını bildirirlər.
2011-ci ildə məcburi hərbi xidməti dayandıran Almaniyada bu sistemin yenidən tətbiqi ətrafında müzakirələr davam edir.
Xüsusilə gənclər arasında məcburi hərbi xidmətə qarşı etirazların güclü olduğu qeyd edilir. Onlar yaşayış xərclərinin artması, işsizlik və sosial problemləri əsas gətirərək yenidən hərbi xidmət keçmək istəmədiklərini bildirirlər.
Hazırda Almaniyada müdafiə xərclərinin artırılması məsələsi təhlükəsizlik ehtiyacları ilə sosial və iqtisadi prioritetlər arasında balansın necə qorunacağı fonunda geniş müzakirə olunur.
