Tramp İran müharibəsinin son tarixini açıqladı
ABŞ Prezidenti Donald Tramp İranla davam edən müharibənin “çox yaxın zamanda” başa çatacağını düşündüyünü bildirib.
Tramp İrlandiya rəsmiləri ilə görüşdən sonra Dublində jurnalistlərin suallarını cavablandırarkən İran, Hörmüz boğazı, Səudiyyə Ərəbistanındakı neft infrastrukturuna hücum, Qəzza və Kanada ilə ticarət məsələləri barədə açıqlamalar verib.
ABŞ lideri müharibənin nə vaxt başa çatacağı ilə bağlı suala cavabında bunun ehtimal ki, ABŞ-də keçiriləcək aralıq seçkilərdən dərhal sonra baş verəcəyini deyib.
Tramp İranın müharibəni mümkün qədər uzatmağa çalışdığını və bununla seçki prosesinə təsir göstərmək istədiyini iddia edib.
“Neft qiymətləri sürətlə aşağı düşəcək”
ABŞ Prezidenti müharibənin başa çatmasının qlobal enerji bazarına da təsir edəcəyini bildirib.
Onun sözlərinə görə, İranla qarşıdurma bitdikdən sonra neft qiymətləri kəskin şəkildə aşağı düşəcək.
Tramp bildirib ki, müharibənin sona çatması enerji bazarında sabitliyin bərpasına və qiymətlərin azalmasına səbəb olacaq.
Bununla yanaşı, o, hazırkı gərginliyin neft bazarında qeyri-müəyyənlik yaratdığını qeyd edib.
Tramp: Hörmüz boğazına nəzarət edirik
ABŞ Prezidenti Səudiyyə Ərəbistanı ilə bağlı yaranan narahatlıqlar fonunda Hörmüz boğazında gəmiçilik təhlükəsizliyi ilə bağlı sualları da cavablandırıb.
Tramp “Hər şey yoluna düşəcək” deyərək Hörmüz boğazı ilə bağlı vəziyyətə nəzarət etdiklərini bildirib.
Onun sözlərinə görə, ABŞ bölgədəki prosesləri izləyir və dəniz nəqliyyatının bərpası ilə bağlı addımlar atır.
Hörmüz boğazı dünya enerji daşımaları baxımından ən mühüm dəniz keçidlərindən biri hesab olunur.
Tramp Səudiyyə Ərəbistanındakı hücuma görə İranı ittiham etdi
ABŞ Prezidenti Səudiyyə Ərəbistanının Şərq-Qərb neft boru kəmərinə edilən PUA hücumu ilə bağlı da danışıb.
İranın bu hücumun arxasında olub-olmadığı barədə suala Tramp “Məncə, belədir, böyük ehtimalla belədir” cavabını verib.
O, Səudiyyə Ərəbistanı vəliəhdi ilə münasibətlərinin yaxşı olduğunu bildirib və hadisənin həll ediləcəyini deyib.
Tramp həmçinin Yəmən xalq hərəkatının ABŞ ilə müharibə aparmaq istəmədiyini düşündüyünü qeyd edib.
Qəzza və Kanada ilə bağlı açıqlamalar
Qəzzadakı vəziyyətə toxunan Tramp ABŞ-nin bölgədə “çox yaxşı iş gördüyünü” iddia edib.
ABŞ Prezidenti Kanada ilə davam edən ticarət danışıqlarından da danışıb.
Tramp Kanadanın ABŞ ilə razılaşma əldə etmək istədiyini bildirib və mümkün ticarət sazişinin “doğru zamanda” imzalana biləcəyini qeyd edib.
O, Kanadanın ABŞ fermerlərinə qarşı daha əlverişli siyasət yürütməli olduğunu vurğulayıb.
Tramp iki ölkə arasında ədalətli razılaşmanın yaxın zamanda əldə edilə biləcəyini bildirib.
