Vilayətidən sərt xəbərdarlıq
İranın ali rəhbərinin siyasi məsələlər üzrə müşaviri Əli Əkbər Vilayəti İsrailin Beyruta hücumundan sonra diqqətçəkən açıqlama verib.
O, sosial şəbəkədə paylaşdığı mesajda bildirib ki, Beyrutda baş verənlərdən sonra “səbir tükənib” və artıq cavab əmri verilib. Vilayəti hərbi hazırlığın ən yüksək səviyyədə olduğunu vurğulayaraq “sıfır saatı çatıb” ifadəsini işlədib.
“Platformalar atış vəziyyətinə keçir”
İran rəsmisi ölkənin və müttəfiqlərinin cavab verməyə hazır olduğunu bildirərək bəyan edib ki, bütün imkanlar qiymətləndirilir və vəziyyət yeni mərhələyə daxil olur.
Onun sözlərinə görə, müqavimət cəbhəsinin hər hansı hissəsinə qarşı hücum bütövlükdə bu cəbhəyə qarşı addım kimi qəbul edilir.
Hörmüz və Bab əl-Məndəb mesajı
Vilayəti çıxışında regionun iki mühüm dəniz keçidinə də toxunub.
“İqtisadi damarlar təhlükə altına düşə bilər”
O bildirib ki, Livandakı hücumlar davam edərsə, Hörmüz və Bab əl-Məndəb boğazları vasitəsilə iqtisadi təzyiq imkanları gündəmə gələ bilər.
Vilayəti bu marşrutları “güclü coğrafi qollar” adlandıraraq onların strateji əhəmiyyətinə diqqət çəkib.
Tehran: Cavab qaçılmazdır
İranın Ali Milli Təhlükəsizlik Şurasının katibi Məhəmməd Baqir Zülqədr də Beyrutdakı hadisələrə münasibət bildirərək cavabın veriləcəyini vurğulayıb.
O qeyd edib ki, müqavimət cəbhələri arasında formalaşan əməkdaşlıq bölgədə vahid təhlükəsizlik zənciri yaradıb.
“Livan ruhumuzdur”
Zülqədr bildirib ki, Livan İran üçün xüsusi əhəmiyyət daşıyır və İslam Respublikasının qırmızı xətlərinin pozulmasına yol verilməyəcək.
Qalibaf: Müqaviməti təcrid etmək mümkün deyil
İran parlamentinin sədri Məhəmməd Baqir Qalibaf da açıqlamasında müqavimət qüvvələrinin tək buraxılmayacağını bəyan edib.
Onun sözlərinə görə, Livanın suverenliyi və ərazi bütövlüyü həm müqavimət qüvvələrinin fəaliyyəti, həm də İran diplomatiyasının səyləri ilə qorunacaq.
Qalibaf əlavə edib ki, İsrailin bölgədə davam etdirdiyi hərbi siyasət uzunmüddətli nəticə verməyəcək.
Müxbir: Livanın müdafiəsində güzəşt olmayacaq
İran rəhbərliyinin müşaviri Məhəmməd Müxbir isə ABŞ və İsrailin paralel şəkildə diplomatik və hərbi təzyiq göstərməsini tənqid edib.
O bildirib ki, İran Livanın müdafiəsi məsələsində heç bir güzəştə getməyəcək və bölgədə qırmızı xətlərin aşılmasına sərt reaksiya veriləcək.
Hücum danışıqlara kölgə saldı
Bütün bu açıqlamalar İsrailin Beyrutun cənub ətrafında yaşayış binasına endirdiyi hücumdan sonra səsləndirilib. Hadisə İran və ABŞ arasında mümkün anlaşma ilə bağlı danışıqların davam etdiyi bir dövrə təsadüf edib.
İran rəsmiləri dəfələrlə vurğulayıblar ki, Livanda hərbi əməliyyatların dayandırılması Tehran üçün əsas şərtlərdən biri olaraq qalır və bu məsələ danışıqlar prosesində xüsusi yer tutur.
