Putin strateji layihənin icrasını tapşırdı
Rusiya prezidenti Vladimir Putin Saxalin adasını ölkənin materik hissəsi ilə birləşdirəcək iri infrastruktur layihəsinin həyata keçirilməsi barədə göstəriş verib.
Çinli ekspertlər hesab edirlər ki, bu addım yalnız dövlət səviyyəli layihə deyil, həm də regionda böyük geosiyasi və iqtisadi dəyişikliklərin başlanğıcı ola bilər.
Layihənin əsası Stalin dövründə qoyulmuşdu
Saxalin adasının materiklə birləşdirilməsi ideyası ilk dəfə 1950-ci ildə İosif Stalin dövründə gündəmə gəlib.
Həmin plan Nevelskoy boğazı üzərindən dəmir yolu və tunel bağlantısının qurulmasını nəzərdə tuturdu.
O dövrdə hər iki istiqamətdən tikinti işlərinə başlanılsa da, Stalinin ölümündən sonra layihə dayandırılmış və uzun illər ərzində həyata keçirilməmişdi.
Moskva istiqamətini Asiyaya çevirir
Layihə 2007-ci ildən yenidən müzakirə olunsa da, yüksək maliyyət və uzunmüddətli geri dönüş səbəbindən təxirə salınmışdı.
Lakin son illərdə Qərblə münasibətlərin pisləşməsi və sanksiyaların artması Moskvanı Uzaq Şərq və Asiya-Sakit okean bölgəsinə daha çox yönəlməyə məcbur edib.
Rusiya hökuməti Saxalinin vahid nəqliyyat sisteminə inteqrasiyası ilə bölgədə neft, təbii qaz və kömür daşımalarının daha səmərəli həyata keçiriləcəyini düşünür.
Layihənin dəyəri trilyon rubla yaxınlaşır
Məlumata görə, layihənin ümumi dəyəri 500 milyard rubldan başlayaraq 1,1 trilyon rubla qədər yüksələ bilər.
Bu məbləğə dəmir yolu ilə yanaşı avtomobil yolu keçidinin də tikintisi daxildir.
Hərbi və logistik əhəmiyyət vurğulanır
Layihənin iqtisadi faydaları ilə yanaşı, hərbi və logistik əhəmiyyəti də ön plana çıxarılır.
Moskva hesab edir ki, yeni keçid Uzaq Şərq bölgəsində təchizat xətlərinin təhlükəsizliyini artıracaq və hərbi qüvvələrin hərəkət imkanlarını genişləndirəcək.
Çinli ekspertlər geosiyasi dəyişiklik gözləyir
Çinli analitiklər bildirirlər ki, Rusiyanın bu addımı Şimal-Şərqi Asiyada ticarət marşrutlarını dəyişə bilər.
Onların fikrincə, layihə enerji və nəqliyyat sahəsində yeni imkanlar açacaq və bölgədəki ticarət dövriyyəsinə ciddi təsir göstərəcək.
Ekspertlər həmçinin hesab edirlər ki, bu infrastruktur təşəbbüsü regiondakı geosiyasi balansın dəyişməsinə səbəb ola bilər.
