Təyyarə dəniz üzərində radardan itib
Pakistana məxsus yük təyyarəsi Birləşmiş Ərəb Əmirliklərinin Şarja şəhərindən Kəraçiyə həyata keçirdiyi reys zamanı dəniz üzərində yoxa çıxıb.
Pakistan Hava Limanları İdarəsinin (PAA) məlumatına görə, “KTA1732” reys nömrəli Boeing 737 tipli təyyarə ilə yerli vaxtla saat 21:32-də əlaqə kəsilib. Bundan sonra hava gəmisindən heç bir məlumat almaq mümkün olmayıb.
Göyərtədə 5 ekipaj üzvü olub
Rəsmi məlumata əsasən, təyyarədə 5 nəfər ekipaj üzvü olub.
Yük təyyarəsinin Pakistanın Bəlucistan əyalətinin Ormara sahilləri yaxınlığında, Kəraçi şəhərindən təxminən 300 dəniz mili (555 kilometr) məsafədə radardan itdiyi bildirilib.
Təyyarə qəfil 34 min fut hündürlük itirib
Radar məlumatları göstərir ki, təyyarə yoxa çıxmazdan əvvəl qısa müddət ərzində təxminən 34 min fut hündürlük itirib.
Pakistan Mülki Aviasiya İdarəsi açıqlayıb ki, pilotlar əlaqə kəsilməzdən əvvəl mühərrik nasazlığı barədə dispetçerlərə məlumat veriblər.
Axtarış-xilasetmə əməliyyatı davam edir
Əlaqənin kəsilməsindən dərhal sonra Pakistanın aidiyyəti qurumları tərəfindən genişmiqyaslı axtarış-xilasetmə əməliyyatı başladılıb.
Hazırda xilasedici qruplar və digər aidiyyəti qurumlar dənizdə itkin düşən təyyarənin yerini müəyyənləşdirmək və ekipaj üzvlərinə çatmaq üçün əməliyyatları davam etdirirlər.
Hadisənin səbəbləri ilə bağlı araşdırma aparılır.
