Vaşinqton İran nefti ilə bağlı qərarını dəyişdi
ABŞ Prezidenti Donald Tramp NATO sammiti üçün Ankarada olduğu vaxt Vaşinqton administrasiyası İranla bağlı diqqətçəkən qərar qəbul edib.
ABŞ Maliyyə Nazirliyinin Xarici Aktivlərə Nəzarət Ofisi (OFAC) İran mənşəli xam neft, neft-kimya və neft məhsullarının istehsalı, satışı, daşınması və yüklənməsinə müvəqqəti icazə verən ümumi lisenziyanın ləğv edildiyini açıqlayıb.
Yeni qadağa qüvvəyə minib
Yeni qərara əsasən, iyulun 7-dən etibarən İran mənşəli xam neft, neft-kimya və digər neft məhsullarının alınması, daşınması, yüklənməsi və satışı ilə bağlı heç bir əməliyyata icazə verilməyəcək.
Beləliklə, ABŞ administrasiyası ötən ay tətbiq etdiyi 60 günlük müvəqqəti güzəşti vaxtından əvvəl dayandıraraq İrana qarşı enerji sanksiyalarını yenidən sərtləşdirib.
Mövcud müqavilələr üçün son tarix müəyyənləşdirildi
OFAC bildirib ki, əvvəlki lisenziya əsasında başlanmış əməliyyatların normal qaydada başa çatdırılması və bağlanması üçün iyulun 17-dək keçid müddəti veriləcək.
Bu tarixdən sonra İran mənşəli məhsullarla bağlı bütün əməliyyatlar tam şəkildə qadağan olunacaq.
Müvəqqəti güzəşt niyə verilmişdi?
ABŞ Maliyyə Nazirliyi iyunun 21-də yayımladığı ümumi lisenziya ilə İran mənşəli xam neft, neft-kimya məhsulları və neft məhsullarının istehsalı, satışı, daşınması və gəmilərdən boşaldılması kimi normalda qadağan edilən əməliyyatlara müvəqqəti istisna tətbiq etmişdi.
Həmin qərara əsasən, lisenziyanın avqustun 21-dək qüvvədə qalacağı və ödənişlərin ABŞ dolları ilə həyata keçirilə biləcəyi bildirilmişdi.
Lakin Vaşinqton yeni qərarla bu güzəşti vaxtından əvvəl ləğv edərək İranın enerji sektoruna qarşı sanksiya siyasətini daha da sərtləşdirib.
