İran ordusundan əməliyyatla bağlı bəyanat
İran ordusunun İctimaiyyətlə Əlaqələr İdarəsi yaydığı bəyanatda “Saeqə” əməliyyatının 27-ci mərhələsi çərçivəsində ABŞ-ın son hücumlarına cavab olaraq Küveytdə yerləşən “Əhməd əl-Cabir” aviabazasının hədəf alındığını bildirib.
Bəyanata görə, hücum pilotsuz uçuş aparatları vasitəsilə həyata keçirilib və bazadakı döyüş təyyarələrinin anqarları, peyk rabitə sistemləri, eləcə də ABŞ ordusuna məxsus avadanlıq anbarları vurulub.
Baza ABŞ əməliyyatları üçün strateji əhəmiyyət daşıyır
İran ordusu açıqlayıb ki, “Əhməd əl-Cabir” bazası ABŞ-ın hava əməliyyatları və müşahidə fəaliyyətində mühüm rol oynayır, həmçinin bölgədə hava dəstəyi üçün əsas mərkəzlərdən biridir.
Bəyanatda qeyd olunub ki, İran Silahlı Qüvvələri və İslam İnqilabı Keşikçiləri Korpusunun (SEPAH) həyata keçirdiyi hücumlar nəticəsində İranın pilotsuz uçuş aparatları və raketlərinin qarşısının alınması ABŞ üçün daha çətin və baha başa gəlir.
“Hücumlar birliyi daha da gücləndirəcək”
İran ordusu bəyanatında ABŞ-ın hücumları, sanksiyaları və təhdidlərinin ölkənin müdafiə əzmini zəiflətməyəcəyini, əksinə, milli birliyi daha da möhkəmləndirəcəyini vurğulayıb.
Həmçinin qeyd edilib ki, zərbələr nəticəsində yaranan itkilər və dağıntılarla bağlı məlumatların yayılmasının qarşısını almaq üçün qarşı tərəf ciddi informasiya məhdudiyyətləri tətbiq edir.
Əvvəlki hücumla bağlı da açıqlamalar səsləndirilib
İran tərəfi bundan əvvəl də SEPAH-ın Küveytdə yerləşən “Əli əs-Salim” aviabazasını hədəfə aldığını və bazada pilotsuz uçuş aparatları üçün iki anqarın, eləcə də yanacaq anbarının məhv edildiyini açıqlamışdı.
