İran ABŞ-ni yeni ittihamlarla hədəfə aldı
İran Xarici İşlər Nazirliyi ABŞ Mərkəzi Komandanlığının (CENTCOM) neft və mayeləşdirilmiş təbii qaz daşıyan tankerlərdən hərbi məqsədlərlə istifadə etdiyini açıqlayıb.
Nazirliyin açıqlamasında bildirilir ki, Vaşinqton və bəzi regional tərəfdaşlarının gəmilərin Hörmüz boğazının cənub marşrutu ilə hərəkət etməsində israr etməsi əslində hərbi fəaliyyətlərin gizlədilməsi məqsədi daşıyıb.
“Hərbi gəmilər tankerlərin arxasında hərəkət edib”
Tehranın məlumatına görə, 26 iyun–8 iyul tarixləri arasında ABŞ hərbi freqatlarının neft və mayeləşdirilmiş qaz daşıyan iri tankerlərlə yanaşı hərəkət etdiyi bir neçə hal qeydə alınıb.
İran tərəfi qeyd edir ki, ABŞ ordusu dəfələrlə kommersiya gəmilərindən hərbçilərin, texnikanın və hərbi avadanlığın daşınması üçün istifadə edib. Həmçinin bəzi gəmilərin izləmə sistemlərini söndürərək İran qüvvələrinin müşahidəsindən yayınmağa çalışdığı vurğulanıb.
XİN-in məlumatına əsasən, iyulun 8-də ABŞ Mərkəzi Komandanlığına məxsus hərbi freqat mayeləşdirilmiş qaz daşıyan tankerə sığınaraq cənub marşrutu ilə hərəkət edib. Tehran bunu ABŞ-ın gələcək hərbi əməliyyatlara hazırlıq niyyətinin göstəricisi kimi qiymətləndirib.
“İran özünümüdafiə hüququndan istifadə edəcək”
İran Xarici İşlər Nazirliyi ölkənin beynəlxalq hüquqa uyğun olaraq özünümüdafiə hüququndan istifadə etməyə davam edəcəyini bildirib.
Açıqlamada ABŞ-ın son hərbi addımlarının İranın suverenliyinə qarşı yönəldiyi qeyd olunaraq, bunun beynəlxalq sülh və təhlükəsizliyə təhdid olduğu vurğulanıb. Tehran BMT Təhlükəsizlik Şurasını bu məsələdə məsuliyyətini yerinə yetirməyə və ABŞ ilə İsrailin hərəkətlərinə münasibət bildirməyə çağırıb.
İran parlamentindən sərt xəbərdarlıq
İran parlamentinin Milli Təhlükəsizlik və Xarici Siyasət Komissiyasının üzvü İbrahim Rzayi bildirib ki, ölkəyə qarşı mümkün hücumlara cavab yalnız Fars körfəzi ilə məhdudlaşmayacaq.
Onun sözlərinə görə, hücumların həyata keçirildiyi bütün hərbi bazalar və obyektlər hədəfə çevrilə bilər.
Əraqçi: Hər hansı hücuma qəti cavab veriləcək
İranın xarici işlər naziri Abbas Əraqçi Pakistan Silahlı Qüvvələrinin komandanı, Türkiyənin və Səudiyyə Ərəbistanının xarici işlər nazirləri ilə keçirdiyi telefon danışıqlarında bölgədəki gərginliyi müzakirə edib.
Əraqçi ABŞ və İsrail tərəfindən atılacaq istənilən addımın, eləcə də region ölkələrinin mümkün iştirakının İran tərəfindən qəti və mütənasib cavabla qarşılanacağını bəyan edib.
