Futbolda yeni dövr başlayır
Beynəlxalq Futbol Assosiasiyaları Şurası (IFAB) futbol oyunlarının daha sürətli və dinamik keçirilməsi məqsədilə bir sıra mühüm qayda dəyişikliklərini təsdiqləyib. Qərarlar IFAB-ın Uelsdə keçirilən 140-cı İllik Baş Assambleyasında qəbul olunub.
Yeni dəyişikliklər taç atışları, qapı zərbələri, əvəzetmələr, zədələnmələr və VAR sisteminin səlahiyyətlərini əhatə edir. Qaydaların 2026-cı ildə keçiriləcək FIFA Dünya Çempionatından etibarən tətbiq olunacağı bildirilib.
Taç və qapı zərbələrinə vaxt məhdudiyyəti qoyuldu
Yeni qaydalara əsasən, hakimlər oyunun dayanması zamanı vaxt itkisini minimuma endirmək üçün taç atışları və qapı zərbələrində geri sayım tətbiq edəcək.
Belə ki, futbolçular taç atışını 5 saniyə ərzində yerinə yetirməlidir. Müəyyən olunmuş vaxt keçərsə, top birbaşa rəqib komandaya veriləcək.
Qapı zərbələrinin gecikdirilməsi isə daha sərt şəkildə cəzalandırılacaq. Əgər qapı zərbəsi vaxtında yerinə yetirilməzsə, rəqib komandanın lehinə künc zərbəsi təyin ediləcək.
Əvəzetmələrdə gecikmə komandaya baha başa gələcək
IFAB oyun tempinə təsir edən əsas amillərdən biri kimi əvəzetmələrə də yeni məhdudiyyət tətbiq edib.
Qaydalara görə, oyunçu dəyişiklikləri maksimum 10 saniyə ərzində tamamlanmalıdır. Əgər bu müddət aşılarsa, meydana daxil olacaq futbolçu oyunun növbəti dayanmasına qədər kənarda gözləməli olacaq.
Bu müddətdə komanda meydanda bir nəfər az futbolçu ilə çıxış etməli olacaq ki, bu da məşqçilərin vaxtdan sui-istifadə imkanlarını məhdudlaşdıracaq.
Zədələnmələr və VAR sistemi ilə bağlı yeniliklər
Yeni qaydalar zədələnmə hallarında da dəyişiklik nəzərdə tutur. Oyunun dayanmasına səbəb olan zədələnmədən sonra futbolçu meydançaya dərhal qayıda bilməyəcək.
Belə oyunçular yenidən oyuna daxil olmaq üçün ən azı bir dəqiqə gözləməli olacaqlar. Bunun məqsədi vaxt itkisini azaltmaq və saxta zədələnmə hallarının qarşısını almaqdır.
VAR artıq daha çox epizoda müdaxilə edəcək
IFAB Video Köməkçi Hakim (VAR) sisteminin səlahiyyətlərini də genişləndirib.
Yeni qərara əsasən, bundan sonra yanlış təyin olunan künc zərbələri və ikinci sarı vərəqə nəticəsində meydandan qovulma epizodları da VAR tərəfindən yoxlanıla biləcək.
Ekspertlər hesab edir ki, bu dəyişikliklər futbolun daha sürətli, ədalətli və tamaşaçı üçün daha cəlbedici olmasına xidmət edəcək.
