Aİ missiyasından yeni təhlükəsizlik xəbərdarlığı
Avropa İttifaqının Qırmızı dənizdə fəaliyyət göstərən “Aspides” dəniz missiyası İsrail, ABŞ və Səudiyyə Ərəbistanı ilə əlaqəli yük gəmilərinə Yəmən sahillərinə yaxın ərazilərdən keçməməyi tövsiyə edib.
Missiyanın açıqlamasında qeyd olunub ki, Qırmızı dəniz və Ədən körfəzində həmin ölkələrlə əlaqələndirilən gəmilər üçün təhlükə səviyyəsi yüksək qiymətləndirilir.
Hansı gəmilər risk altında sayılır?
“Aspides” bildirib ki, xəbərdarlıq yalnız həmin ölkələrin bayrağı altında üzən gəmilərə deyil, son dövrlərdə Səudiyyə Ərəbistanı limanlarında dayanmış, yük boşaltmış və ya yükləmiş istənilən ölkəyə məxsus gəmilərə də şamil edilir.
Missiyanın qiymətləndirməsinə görə, belə gəmilər Səudiyyə Ərəbistanının maraqları ilə əlaqəli hesab oluna və potensial hədəfə çevrilə bilər.
Elektron izləmə sistemlərinin məhdudlaşdırılması tövsiyə olunub
Avropa İttifaqının missiyası Səudiyyə Ərəbistanı limanlarında olmuş gəmilərə üzmə zamanı elektron izlərini minimuma endirməyi tövsiyə edib.
Bunun üçün gəmilərə avtomatik identifikasiya sistemlərindən (AIS) və digər izləmə məlumatlarının ötürülməsindən mümkün qədər məhdud istifadə etmək məsləhət görülüb.
Xəbərdarlıq Yəmənin qərarı ilə eyni vaxta təsadüf edib
Aİ-nin xəbərdarlığı Yəmənin Səudiyyə Ərəbistanına qarşı elan etdiyi dəniz blokadasının qüvvəyə minməsindən sonra verilib.
Yəmənin Səba agentliyinə danışan hərbi mənbə bildirib ki, Yəmən Silahlı Qüvvələrinin xəbərdarlıqlarından sonra bəzi gəmilər marşrutlarını dəyişərək geri qayıdıblar.
Reuters: Neft tankerləri istiqamətini dəyişib
Bu arada Reuters agentliyi Səudiyyə nefti daşıyan bəzi tanker gəmilərinin Qırmızı dənizdə marşrutlarını dəyişərək Süveyş kanalına doğru geri döndüklərini yazıb.
Yəmən tərəfi bu addımların elan etdiyi “blokadaya blokada” strategiyasının nəticəsi olduğunu bildirir və Səudiyyə Ərəbistanına qarşı tətbiq olunan dəniz məhdudiyyətlərinin davam edəcəyini bəyan edir.
Bundan əvvəl Yəmən Silahlı Qüvvələri Səudiyyə Ərəbistanının Əbha Beynəlxalq Hava Limanına ballistik raketlər və pilotsuz uçuş aparatları ilə zərbələr endirdiyini açıqlamışdı. Bu əməliyyatın Səudiyyə Ərəbistanının Səna Beynəlxalq Hava Limanına endirdiyi hücuma cavab olduğu bildirilmişdi.
