ABŞ-ın Kaliforniya ştatının Stokton şəhərində şənbə günü ailə iclasına silahlı hücum həyata keçirilib. San Xoakim dairə polisinin məlumatına görə, hadisə nəticəsində 4 nəfər həlak olub, bir neçə nəfər müxtəlif dərəcəli xəsarətlər alıb. Silahlı hücum zamanı evdə ümumilikdə 14 nəfər ailə üzvü olub.
Polisin ilkin araşdırmalarına əsasən, hücumun qəsdən törədildiyi ehtimal edilir və hazırda motivin müəyyənləşdirilməsi, eləcə də hücumu törədən şəxslərin tapılması istiqamətində istintaq aparılır.
Vaşinqtonda daha bir silahlı hücum baş vermişdi
Bu hadisədən bir neçə gün əvvəl, noyabrın 26-da ABŞ paytaxtı Vaşinqtonda Ağ Ev yaxınlığında silahlı hücum qeydə alınmışdı. Qərbi Virciniya Milli Qvardiyasının iki əməkdaşı hədəf alınmış, onlardan biri həyatını itirmiş, digəri isə ağır yaralanmışdı.
Təhlükəsizlik tədbirləri artırılır
Vaşinqtonda baş verən hücumun ardınca ABŞ müdafiə naziri Pet Heqset açıqlayıb ki, prezident Donald Trampın göstərişi ilə şəhərdə təhlükəsizlik tədbirlərinin gücləndirilməsi məqsədilə əlavə 500 Milli Qvardiya hərbçisi paytaxta göndəriləcək.
