ABŞ-da “Qara Cümə” onlayn satışlarında kəskin artım
“Adobe Analytics” tərəfindən açıqlanan yekun məlumatlara əsasən, ABŞ-da bu il “Qara Cümə” günü onlayn alış-veriş xərcləri ötən illə müqayisədə 9,1% artaraq 11,8 milyard dollara çatıb. Şirkət bildirir ki, alış-veriş mövsümünün əvvəlindən bəri artan onlayn tələbat bu tarixin ən yüksək göstəricilərindən birini formalaşdırıb.
Həftəsonu satışlarında da artım gözlənilir
Məlumatlara görə, istehlakçıların bu gün – şənbə günü təxminən 5,5 milyard, sabah isə 5,9 milyard dollar xərcləyəcəyi proqnozlaşdırılır. Bu rəqəmlər ötən ilin eyni dövrü ilə müqayisədə müvafiq olaraq 3,8% və 5,4% artım deməkdir. Analitiklər hesab edirlər ki, alış-veriş mövsümünün qalan günlərində də sürətin davam etməsi ehtimalı yüksəkdir.
“Salesforce”: Lüks geyim və aksesuarlar daha çox satılıb
Digər tərəfdən, “Salesforce” şirkətinin açıqladığı məlumatlarda ABŞ istehlakçılarının “Qara Cümə” günü ümumilikdə 18 milyard dollar xərc etdiyi bildirilib. Bu göstərici ötən illə müqayisədə 3% artım deməkdir. Şirkət qeyd edir ki, xüsusilə geyim və lüks aksesuar kateqoriyalarında əhəmiyyətli satış artımı qeydə alınıb.
Bununla yanaşı, “Salesforce” qiymətlərin yüksəlməsinin onlayn tələbə müəyyən təsir göstərdiyini vurğulayır. Məlumata əsasən, istehlakçılar daha yüksək məbləğdə xərcləsələr də, sifariş başına alınan məhsul sayı azalıb. Bu tendensiya inflyasiya fonunda daha praqmatik alış davranışlarının formalaşdığını göstərir.
Fiziki mağazalarda durğunluq müşahidə olunub
Hər iki şirkətin ümumi müşahidələrinə görə, “Şükranlıq günü”ndən sonrakı səhər fiziki mağazalara maraq əvvəlki illərlə müqayisədə daha zəif olub. Sakinlər bunun səbəbi kimi davam edən inflyasiya, maliyyə qeyri-müəyyənliyi və həddindən artıq xərcləmə qorxusunu göstəriblər. Bu vəziyyət onlayn satışların yüksəlməsinin əsas səbəblərindən biri kimi qiymətləndirilir.
“Cyber Monday” mövsümün ən böyük onlayn alış günü ola bilər
“Adobe Analytics” proqnozlarına görə, mövsümün ən böyük onlayn alış-veriş günü ənənəvi olaraq “Cyber Monday” olacaq. Şirkət həmin gün üçün 14,2 milyard dollarlıq satış gözləyir ki, bu da ötən illə müqayisədə 6,3% artım deməkdir. Analitiklər bunun həm endirimlərin daha cəlbedici olacağı, həm də onlayn platformalara keçidin sürətlənməsi ilə bağlı olduğunu bildirirlər.
