ABŞ Konqresində Trampın Venesuela siyasətinə qarşı narazılıq artır
ABŞ-ın “Responsible Statecraft” nəşrinin məlumatına görə, Vaşinqtonun siyasi dairələrində Tramp administrasiyasının Venesuelaya qarşı mümkün hərbi eskalasiyaya hazırlaşdığına dair siqnallar güclü narazılıq doğurub. Demokrat və respublikaçı qanunvericilər administrasiyanı “Konqresi kənara qoyaraq yeni müharibəyə sürükləmək”də ittiham edir.
Konqres üzvləri ABŞ-ın yeni müharibəyə nə icazəsinin, nə də ictimai dəstəyinin olduğunu bildirərək, Tramp administrasiyasının addımlarını təhlükəli adlandırırlar.
CIA əməliyyatları və hərbi hazırlıqlar: İraq 2003-ü xatırladır
“The New York Times”ın yaydığı və “Responsible Statecraft”ın istinad etdiyi hesabata görə, Donald Tramp CIA-ya Venesuela daxilində gizli əməliyyatlara başlamaq üçün yaşıl işıq verib. Eyni zamanda ABŞ ordusunun Karib dənizi və Sakit okeanın şərqində guya “qanunsuz ticarət gəmiləri”nə qarşı zərbələri davam edir.
Pentaqon da Latın Amerikasındakı köhnə hərbi bazaların yenidən aktivləşdirilməsi üzərində işləyir. Administrasiya daxili və xarici auditoriyaya Venesuela Prezidenti Nikolas Maduronu “diktator” və “terrorçu” kimi təqdim edir — bu isə bir çox müşahidəçi tərəfindən İraq işğalından əvvəlki atmosferə bənzədilir.
Konqresdən sərt reaksiyalar: “Bu, yeni bir İraq səhvidir”
Bir sıra nüfuzlu demokrat və respublikaçı qanunvericilər Tramp administrasiyasını açıq şəkildə tənqid edir:
-
Ro Xanna (demokrat) — administrasiyanı İraq müharibəsinin təkrarı ilə hədələməkdə günahlandırıb.
-
Tim Keyn (demokrat senator) — Venesuela ilə bağlı Trampdan tam strateji izahat tələb edib.
-
Rand Pol (respublikaçı senator) — Trampı Konqresi kənara atıb müharibə başlatmaqda ittiham edib: “Heç kim Konqresin icazəsi olmadan savaş aça bilməz”.
-
Marjori Teylor Qrin (respublikaçı) — Venesuelada “rejim dəyişikliyi” planlarına qarşı çıxıb.
-
Tomas Massi (respublikaçı) — “Xarici macəralara pul var, amma dövlət əməkdaşlarının maaşlarına yox?” sualını qaldırıb.
Bəzi dairələrdə Trampı müdafiə edən fikirlər də səslənir — məsələn, senator Lindsi Qrehem, həmçinin Latın Amerikası xəttində hərbi eskalasiyanın əsas təşviqçilərindən biri sayılan Marko Rubio.
Hüquqi əsasın açıqlanması tələb olunur
Bir qrup senator Müdafiə Nazirliyinə müraciət edərək Karib və Sakit okean regionunda yaxınlarda həyata keçirilmiş hava zərbələrinin hüquqi əsasının açıqlanmasını tələb edib. Onlar Tramp administrasiyasının Konqresdən yan keçərək hərbi gücü genişləndirməyə çalışdığını deyirlər.
ABŞ ictimaiyyəti yeni müharibəyə qarşıdır
Son sorğular göstərir ki, amerikalıların böyük əksəriyyəti Venesuelada hərbi müdaxiləni dəstəkləmir. Ekspertlər bildirirlər ki, Tramp administrasiyasının gərginliyi artırması həm siyasi, həm hüquqi, həm də regional müstəvidə riskləri kəskinləşdirir.
