Arsenal 5-də 5 etdi: Bayern Münih Londonda məğlub oldu
UEFA Çempionlar Liqasının 5-ci turunda “Emirates” stadionu böyük qarşılaşmaya ev sahibliyi edib. İngiltərə təmsilçisi Arsenal bu turda Almaniya nəhəngi Bayern Münihi qəbul edib və oyundan 3:1 hesabı ilə qalib ayrılaraq qrupdakı mükəmməl seriyasını davam etdirib.
Arsenal matça üstün başlayan tərəf olub. 22-ci dəqiqədə Yurrien Timber dəqiq zərbə ilə hesabı açıb – 1:0. Bayern Münih isə 32-ci dəqiqədə gənc Lennart Karlın qolu ilə cavab verib və ilk hissə 1:1 hesabı ilə başa çatıb.
İkinci hissə: Arsenal temp artırdı
İkinci hissədə oyuna daha çox nəzarət edən Arsenal 69-cu dəqiqədə Noni Maduekenin qolu ilə yenidən önə keçib – 2:1. Bu qoldan cəmi 8 dəqiqə sonra, 77-ci dəqiqədə Qabriel Martinellinin zərbəsi matçın taleyini müəyyənləşdirib – 3:1.
Arsenal bu nəticə ilə Çempionlar Liqasında ardıcıl beşinci qələbəsini qazanaraq xalını 15-ə yüksəldib və qrupda liderlik kürsüsünə sahib olub.
Bayern üçün mövsümün ilk məğlubiyyəti
Bu qarşılaşmaya qədər dörd oyunda 12 xal yığaraq lider olan Bayern Münih isə mövsümdə ilk dəfə meydanı məğlub tərk edib. Alman təmsilçisi 5-ci turun ardından 3-cü yerə geriləyib.
Arsenal isə eyni zamanda bu mövsüm ilk dəfə qapısından top buraxıb. Bununla belə “Topçular” indiyədək 14 qol vuraraq turnirin ən təsirli hücum xətlərindən birinə sahib olduğunu bir daha göstərib.
