Pakistanın Feysalabad şəhərində faciəvi partlayış: 15 nəfər həyatını itirdi
Pakistanın Pəncab əyalətində yerləşən Feysalabad şəhərində yapıştırıcı istehsalı ilə məşğul olan müəssisədə baş vermiş güclü partlayış kütləvi insan tələfatına səbəb olub. Yerli “Dawn” qəzetinin məlumatına görə, partlayış Malikpur bölgəsindəki fabrikdə qaz sızması nəticəsində meydana gəlib və qısa müddətdə böyük yanğına çevrilib.
Hadisə zamanı 15 nəfər həlak olub, çox sayda insan isə müxtəlif dərəcəli xəsarətlər alıb. Yanğın fabrikin yaxınlığındakı binalara da sıçrayıb və ərazidəki yaşayış evlərinə ciddi ziyan vurub.
7 ev zərər gördü, damlar çökdü
Rəsmi şəxslərin açıqlamasına görə, partlayışın gücü o qədər böyük olub ki, ətrafdakı 7 evə ciddi ziyan dəyib, fabrikin və bitişik tikililərin damları tamamilə çöküb. Fövqəladə hallar xidmətləri dağıntılar arasında qalanların xilas edilməsi üçün ərazidə əməliyyat-axtarış işlərini davam etdirir.
Xilasedicilər hadisə yerində vəziyyətin hələ də təhlükəli olduğunu, qaz sızmasının tam nəzarət altına alınmasından sonra genişmiqyaslı təmizləmə işlərinə başlanacağını bildiriblər.
İstintaq başladı
Faktla bağlı rəsmi qurumlar tərəfindən xüsusi istintaq komissiyası yaradılıb. Komissiya həm qaz sızmasının səbəbini, həm də müəssisədə təhlükəsizlik qaydalarının pozulub-pozulmadığını araşdıracaq.
Ekspertlər Pakistanın sənaye bölgələrində təhlükəsizlik standartlarına əməl olunmaması ilə bağlı uzun müddətdir xəbərdarlıq edir və bu tip faciələrin qarşısının alınması üçün ciddi nəzarət mexanizmlərinin gücləndirilməsini tələb edirlər.
