Suriya hökuməti Netanyahunun səfərini kəskin qınadı
Suriya Xarici İşlər Nazirliyi İsrail baş naziri Benyamin Netanyahunun, həmçinin “təhlükəsizlik” naziri Yisrael Katsın, xarici işlər naziri Gidon Saarın və digər yüksək rütbəli İsrail rəsmilərinin Cənubi Suriyaya etdiyi səfəri sərt şəkildə pisləyib. Rəsmi açıqlamada bu səfərin “qanunsuz” olduğu və BMT Təhlükəsizlik Şurasının müvafiq qətnamələrinə zidd şəkildə “yeni fakt yaratmaq cəhdi” kimi qiymətləndirildiyi bildirilib.
Nazirliyin bəyanatında qeyd olunur ki, İsrailin bu addımı Suriyanın suverenliyinə və ərazi bütövlüyünə qarşı ciddi təcavüzdür. Dəməşq bir daha İsrail qüvvələrinin Suriyanın bütün işğal olunmuş ərazilərindən dərhal çıxmasını tələb edib və bildirib ki, İsrailin cənub bölgəsində atdığı bütün addımlar beynəlxalq hüquqa əsasən etibarsızdır və heç bir hüquqi nəticə doğurmur.
Suriya tərəfi beynəlxalq ictimaiyyəti öz öhdəliklərini yerinə yetirməyə çağıraraq, İsrailin bölgədəki pozuntularının qarşısının alınmasını və 1974-cü il Atəşkəsin Ayrılması Sazişinə tam şəkildə qayıdılmasını tələb edib.
Netanyahunun səfərinin məqsədi nə idi?
İsrailin “Kanal 11” ictimai yayım qurumunun məlumatına görə, Netanyahunun səfərində müdafiə və təhlükəsizlik sahəsinin əsas fiqurları, o cümlədən İsrail ordusunun Baş Qərargah rəisi Eyal Zamir və “Şabak” rəhbəri David Zini də iştirak edib. Rəsmilər bölgədəki vəziyyətlə bağlı hərbi komandanlıqdan brifinqlər alıblar.
Eyni mənbə xəbər verir ki, səfər ABŞ-ın İsrail və Suriya arasında təhlükəsizlik sazişi imzalanması ilə bağlı apardığı təşəbbüslərin uğursuzluğa uğradığı bir vaxtda baş tutub. Məlumata əsasən, danışıqlar bir müddətdir çıxılmaz vəziyyətə düşüb.
Səfərin digər diqqətçəkən məqamı isə Netanyahunun korrupsiya ittihamları üzrə Tel-Əviv Mərkəzi Məhkəməsində keçirilməli olan iclasını “təhlükəsizliklə bağlı təcili məsələ” səbəbilə ləğv etməsi ilə eyni günə təsadüf etməsidir.
İsrailin Suriya cənubundakı mövcudluğu genişlənir
Məlumatlara görə, İsrail 8 dekabr 2024-cü ildə əvvəlki Suriya rejiminin süqutundan sonra ölkənin cənub bölgələrinin geniş hissələrini nəzarətə götürüb. İsrail qüvvələrinin bir sıra məntəqələrə doğru irəliləməsi Dəməşqin suverenliyinə açıq müdaxilə kimi dəyərləndirilir. Suriya tərəfi bunun regional təhlükəsizlik üçün ciddi risklər yaratdığını bildirir.
Rəsmi Dəməşq beynəlxalq hüquqa uyğun olaraq ərazi bütövlüyünü müdafiə etdiyini vurğulayır və İsrailin bölgədəki mövcudluğunu tamamilə qanunsuz hesab edir.
